有好多朋友成日同我車報員講，話啲代理賣咗部車畀佢之後，好多時都唔會再理佢哋，就算想問吓部車某啲設備點用，諗極都話諗唔到問邊個好喎！講真，我又未覺得情況差到咁，至少你去Showroom問班Sales大哥，又或者係ServiceCentre嘅維修顧問，佢哋都會好樂意作答。
不過，如果好似Mercedes-Benz咁，我諗大家會更為放心；話說廠方同香港代理仁孚行合作，特別為新C-Class嘅車主搞咗個名為Drivingatitsbest嘅工作坊，等佢哋可以好輕鬆咁認識自己嘅新座駕。呢個工作坊分兩部份，第一部份由獲廠方德國總部認可專業培訓資格嘅資深導師，以小組形式進行講解，介紹新車嘅特點之餘，亦介紹咗維修中心嘅服務詳情；第二部份則以真車示範，由導師向車主們介紹車上各項設備嘅應用。據有關方面所講，佢哋搞呢啲工作坊嘅目的，主要係為咗令新車嘅車主可以喺輕鬆嘅環境下清楚知道座駕嘅特性，以及喺日後點樣進行保養維修等等。咦，唔知其他代理又會唔會效法佢哋咁搞吓工作坊，等班新車車主可以清楚知道座駕嘅特性呢？
記者：車報員