外資賭場近年排隊殺入澳門搵銀，賭王何鴻燊變陣應付，澳博幾經波折先喺香港掛牌，下一個大動作，相信係重建有38年歷史，澳門歷史最悠久嘅葡京酒店娛樂場，希望成為澳門新地標，回復昔日雄風。
相信唔少香港人都去過葡京玩兩手，無論贏好輸好，印象最深肯定係個好似雀籠咁嘅建築物，據講呢個雀籠係一個風水局，賭仔入到去就好似雀仔咁被困籠中，想走都唔容易，即係要焗賭，加埋好多人認為場內有強力風水陣，點旺都贏唔到賭王。
12個設計5個有雀籠
呢個雀籠風水局喺坊間流傳多年，賭王噚日終於自揭底牌。佢話葡京酒店賭埸外形似雀籠，實情唔係風水局，亦唔係想困住啲客仔，佢透露當年興建葡京，係由佢親戚甘洺（EricCumine）一手一腳設計，甘洺係中英混血兒，對風水一竅不通，賭王當年亦冇要求擺風水局，所以傳言葡京有個雀籠風水局，只係賭仔姓賴以訛傳訛嘅流言。
甘洺係上世紀香港知名建築師，北角邨、啓德機場客運大樓都係佢作品，即將清拆嘅蘇屋邨亦出自佢手筆，呢啲建築先後被拆，葡京都可能難逃成為歷史，因為賭王決定重建，並邀請六間國際級建築師樓提交新設計；12個新設計噚日曝光，各有特色，其中5個都保留原有雀籠建築物，冇人敢貿然破咗賭王個起家發迹風水局。
最破格拆咗雀籠嘅設計，係兩幢雙子塔式建築，中間有天橋連接，至於其他幾個設計，八方側聞在場人士耳語，都私下猜測佈局可能大有玄機。其中一個屏風樓式設計，十足有個大靠山，莊家至啱；另一個大包圍式方案，新建築物包住雀籠，安全感最高好穩陣咁款；在場較多人談論嘅係凱旋門設計，入得賭場都想贏錢而回，呢個設計莊、閒都受落。
呢批葡京未來面貌模型，即日起至下月3日喺新葡京展出，咁啱過大海嘅市民可以去睇吓，賭王話歡迎大家畀意見，佢暫不表態；接近賭王人士同八方講，賭王其實好鍾意雀籠設計，估計重建葡京好大機會保留個雀籠，預算葡京重建工程2012年竣工。
其中6個參賽模型
