【本報訊】四名南亞裔男子昨凌晨假扮乘客，在赤柱舂磡角毆打及行劫一名的士司機，幸司機早有準備及時跳車逃走，擺脫賊人只受輕傷。事主說僅損失百餘元，身上5,000元則保不失，「我成日踢波好好氣跑得快，佢哋冇個人追到我，我一話報咗警差人嚟緊，就嚇到佢哋唔敢再追走晒啦！」 記者：李家傑
機警之的士司機姓胡（57歲），他透露當夜更司機10多年，閒時駕車喜歡踢足球；昨凌晨3時許，他在灣仔接載兩名操流利廣東話南亞裔男子，分坐前後座，表示往柴灣接載兩同鄉。
路線太可疑
的士開行途中，兩人曾多次用手機以家鄉話與人傾談，抵達柴灣豐業街再有兩名南亞裔男子登車，要求胡開車往西貢參加派對，頓時令胡生疑，「由灣仔到柴灣再到西貢，車費要幾百蚊唔係少錢，一般人唔會咁坐法，我覺得有問題！」
胡為求脫身使出「靠嚇」一招，「我同佢哋講：『你哋有冇身份證㗎？入西貢條路好多警察路障隨時查車㗎！』」胡希望嚇怕對方即時下車，豈料他們以家鄉話傾談後，改往赤柱舂磡角。
「我心想今次走唔甩，立即將放係身邊嘅手機放入褲袋，隨時準備跳車，又希望遇上警車或路障，可惜一路都唔見有差人！」當的士抵達環境僻靜的舂磡角迴旋處時，四人分別向胡箍頸及襲擊其頭部，聲言打劫，幸他早有準備發難掙脫打開車門逃走，賊人啣尾窮追。
「我一路大叫打劫同叫救命，又從褲袋攞出手機報警。我平日有踢波跑得快又夠氣，佢哋冇個追到我，我大聲話報咗警差人嚟緊，就嚇到佢哋唔敢再追！」胡打趣說：「今次firsttime遇劫，希望亦是lasttime啦！」