講到接機，我求大俠就覺得係人生入面其中一件好煩嘅事。一嚟成日唔知你接嗰個人喺邊個出口出嚟，二嚟又驚認唔到人，仲有時啲時間搞到亂晒龍㖭！不過接到就尤自可，接唔到機就真係把幾火，好似PAOK一班球迷去接「伊巴謙莫域」機「食詐糊」，就真係得啖笑囉！
官網擺烏龍連累fans
PAOK嘅官方網站前排就登出一段新聞，就話嚟自阿特蘭大嘅球星「伊巴謙莫域」已經落實加盟，咁一大班迷就當然好興奮去接機啦！但係各位球迷都知道，PAOK只係一間希臘嘅中游球會，間唔中會喺歐協盃見到佢哋，仲加上係嚟自阿特蘭大，又何來會有「伊巴謙莫域」呀？相信大家都會覺得好疑惑，但班PAOK球迷一於照去可也，去到先發現接嗰位仁兄係來自阿特蘭大嘅梅斯連莫域！
真假伊巴似足九成
雖然官網後來都話係佢哋自己打錯咗，但點解PAOK班球迷會咁失策？原來伊巴謙莫域同梅斯連莫域有好多共通點。首先，兩個球員個名都似到十足，大家都係叫「Zlatan」，同埋個姓嘅尾都有「movic」；其次就咁啱兩個人都係有波斯尼亞血統同埋揸瑞典護照，認真夠邪。咁都未算，最fake到啲球迷都係官網介紹嗰張相，阿特蘭大同國際米蘭都係着藍黑直間波衫，而伊巴同梅斯連莫域都係差唔多有1米90咁高，仲要都打前鋒，驟眼睇認錯都唔奇！
今次PAOK班球迷雖然「食詐糊」，但如果梅斯連莫域見到咁多球迷嚟接機，心入面點都會覺得感動啦，嚟緊新球季落力啲入多幾球報答PAOK啲球迷，總算對球會有好處嘅！