繼中國林大（910）之後，噚日又跑出一隻公佈業績後急升之股仔，中國水務（855）逆市急升15%。公司截至08年3月底止全年業績，股東應佔溢利4.27億元，較07年同期增長5.74倍，每股盈利34.62仙，牌面PE低至6倍。
集團期內營業額升4.68倍至7.66億元，因年前收購的多個水務項目提供貢獻，其中供水業務收益就大增3.31倍至2.4億元。不過公司也不是沒有特殊收益，期內就有2.79億元之財務資產公平值收益入賬，上年同期為1億元。
供水業務算係公用事業，一般公用股都有較佳抗跌力，但中國水務去年11月跟隨大市由5.95元高位回落，3月最低跌至1.75元，勁跌7成，同一般股仔無異。中國水務市值一啲都唔細，去年11月時市值曾高達73億元，𠵱家剩番27億，其間財富蒸發唔係少數目。
航空股業績難看好
有公司發佈理想業績，惟差勁業績者仍佔多數，擁有奧運概念的北京首都機場（694）更發出盈警，預告截至6月底止盈利較上年同期大幅下跌，原因包括今年首季民航局對機場實施航班限制、油價高企影響航班增加、全球經濟放緩影響航運需求，以及3號航站樓投入營運增加成本。
照計京奧前北京會有大量進口及人流，何以北京在京奧前的客貨運情況會如此惡劣，真係睇到人一頭霧水。還是大行有先見之明，上周花旗出報告，重申給予首都機場沽售評級，原因是預期今年上半年盈利將令人非常失望，目標價睇6.05元。首機都發盈警，睇嚟航空股業績都係有「驚」無喜。