最近民怨沸騰，特首支持度跌至谷底，最慘不忍睹的部門，公營醫療認了第二，睇怕都無人敢認第一。
除了「軟件事故」外，最近連「硬件」亦出現問題，兩架救護車死火跪低，拖延急救。我哋唔好怪負責駕駛嘅消防處，亦唔好鬧壟斷維修的機電署。
無可能保證完美
唔記得那本管理書話，今時今日，企業開發新產品同服務，唔可以再諗住「放棄5%質素，換取節省95%成本」，因為人類對不完美的忍耐力已所餘無幾。利世民君亦話：「比起以前，𠵱家呢個世界進步得太快喇，副產品就係我哋嘅忍耐力差咗好多。」
跟Nokia管理層見面，講開手機，佢哋都話：「如果客戶對部手機有咩問題，我哋會派人上門教埋你用！」Nokia手機以耐用聞名（限舊model），如果連Nokia都明白，要保證部手機完全無問題，根本係無可能，因此退而求其次，安排員工上門幫手，更何況保養救護車係政府的機電署呢？
求人不如求己
咩話？死人㗎喎，咁都唔鬧得？無錯，安全套穿咗分分鐘都會死人，當然如果穿咗出事，我哋或者會埋怨，但至少會明白世上並無絕對riskfree呢樣嘢。再諗深一層，其實我哋香港人太幸福，換個非洲人，問佢受咗傷，救護車跪低點算，佢可能會答：「受咗傷仲搭車做咩？救急？自己醫好咪急救咯，醫唔好咪死咯。」
只要每個香港人識得咁諗，咁我哋仲可以有咩煩惱？局長助理、公務員加薪、通脹、醫療事故，一律都唔係問題。所以，現今的香港人，要提昇生活質素，增加個人競爭力，先決條件係要提高自己的EQ！
邊度最合適修練EQ？公立醫院。信我，住番一頭半個月，只要由始至終保持住不慍不火，你掂咗㗎喇！
網誌： http://wanszezit.wordpress.com/
電郵：mailto:[email protected]