上個禮拜，阿里巴巴（1688）主席馬雲發咗封內部電郵畀員工，叫佢哋準備提早「過冬」，呢番言論喺內地IT界引起好大迴響，聯想（992）主席楊元慶對《新華網》嘅記者話：「冬天來了，誰能熬過去，得看誰的衣服厚。」最近為贊助北京奧運奔波嘅楊元慶，連回應都加入奧運元素，佢話面對𠵱家形勢，應該靜落嚟做好長跑嘅準備。
不過，唔係個個都咁「先天下之憂而憂」，騰訊（700）嘅馬化騰就話，咁多呢啲消息喺市場流傳，就係呢行本身脆弱嘅表現，佢期望廣告業務係騰訊嘅未來。搜狐張朝陽就話，唔覺得要過冬，反而感到「春意盎然」，擺明「潤」馬雲，張朝陽仲話中國大圍經濟雖然不景氣，但咁樣啲人先更要有效使錢，例如賣嘅廣告要更精準。佢咁講，都係想話你知佢對自己好有信心，啲客識揀佢。