公關大姐大請吃晚飯，席設莊士敦道杭州飯店，此夜不談公關，只談閒事、逸事、飲食事，因有蔣芸、蔡瀾、張大姐、紫微楊在，更有梁教授、董社長伉儷、靚女Ｙ，幾時輪到左丁山出聲呀，一於聽而不講，猛咁袋錢落自己袋，食得高興。如此場合，本來無甚火花嘅，點知張大姐講起《赤壁》就越講越激昂，加上蔣芸一早為文撥火，於是變成「三國演義」，兩位女將大戰蔡瀾，口沫橫飛，認真精彩。原來吳宇森曾經請教過蔡瀾如何適應市場，改編三國橋段，於是出現八陣圖出現於赤壁故事！吳宇森大嘅一早諗住《赤壁》在美國及外國上演，要吸引美國觀眾，梗係注重打鬥場面，戰事連場啦，至於三國歷史人物故事，美國人之認知，相等於香港觀眾對賓虛，ElCid之認識，算鬼數啦。張大姐就認為即使要適應美國市場，吳宇森嘅改編仍然多餘兼過份。
蔣芸數吓在座十一人之中，中大人佔咗七位，其中又以崇基四人為多數，點不知紫微楊舉手話：「我都算係崇基㗎，讀到三年級下學期先至退學，主修經濟，老師係麥健增，當時院長係李應林，最初喺港島上課，後來搬入馬料水。」崇基第一屆畢業生冇紫微楊之名，原來佢係冇畢業到，現在睇番轉頭，可能崇基之失，倪匡亦曾在聯合肄業，至於有冇畢業，左丁山就唔知，但聯合書院認佢係校友，仲請佢返聯合講學。
崇基學院紀念李應林，有一座宿舍建於一九五八年，名為應林堂，今年慶祝五十周年，舊宿生在《蘋果日報》（七月二十六日）刊登半版廣告，十分矚目，廣告有對聯云：「崇高浩氣揚五十良辰不負海山共應，基本雄姿在三千好漢曾經風雨同林。」曾在崇基讀中文系因得罪教授而畢唔到業之中文Ｙ來電云：「應林對聯可稱及格，但唔夠工整，上聯崇高浩三字皆為形容詞，海山共應不如海山互應，下聯基本雄姿太俗，三千好漢似梁山好漢噃，不如改為三千學子。咁啦，上聯不如改為：崇高氣節揚五十良辰不負海山互應，下聯就係：基督精神在三千學子曾經風雨同林。」經佢一改果然係好啲。過咗三十分鐘，中文Ｙ又打電話嚟：「諗到仲好啲嘅，聽住，上聯係：崇德修文共慶金禧曾聽濤聲讀書聲遙相和應，下聯係：基平礎實唯傳木鐸聚論國事天下事師法東林。」