由新城舉辦嘅《國語力頒獎禮》今晚舉行，繼續香港幫鬥台灣幫，今年係以勁歌熱舞為主題，所以嚟得攞獎嘅嘉賓個個都係跳得之人，馮仁昭八到過去嘅大贏家劉德華因為有事去唔到，所以今年嘅大贏家變咗係陳奕迅（Eason），而且仲話起碼捧5個獎，其中一個仲要係國語力年度大獎㖭。
家駒封殿堂歌手
今次頒獎禮全部獎項加埋有成近100個，總之人人有份。新城為咗紀念逝世15周年嘅黃家駒，仲特別加多一個國語力殿堂歌手大獎，到時由細佬家強上台代領獎。
呢次蔡卓妍（阿Sa）係第一次以個人名義攞獎，以前同鍾欣桐（阿嬌）以Twins拍住上，不過今時唔同往日，阿嬌好似完全退出咁，阿Sa惟有自己頂硬上，不過唔使驚，一樣有獎。至於容祖兒雖然唔係大贏家，不過佢都攞唔少獎，香港歌手仲有何韻詩、鄭希怡咁。
台灣幫今次都好畀面，偶像派嘅羅志祥（小豬）同當紅嘅S.H.E梗係有份攞獎，小豬仲會同潘瑋柏大鬥舞技，而新崛起嘅星光幫成員林宥嘉同蕭敬騰都齊齊有獎分，任賢齊、蕭亞軒、張信哲同蘇打綠等都唔少得分埋一份。周杰倫同蔡依林因為冇期嚟唔到，所以攞獎就冇佢哋份喇！
