全球最大型網上中文搜尋器百度董事長李彥宏近日去咗台灣，前晚應邀喺台大演講，係近60年嚟第一個喺台大演講嘅大陸企業家。
喺前晚嘅演講，話題更離不開百度嘅創業經過同未來發展，在場觀眾最有興趣係百度有冇打算開拓台灣市場，李彥宏嘅答案係：「非常有興趣，不過還未有具體計劃。」佢仲話，「好早就想來台灣看看。」
不過最有趣嘅係，有個後生仔同李彥宏講：「我在美國留學時，200幾美元買入百度，400多元賣出，幫我賺咗最後一個學期的學費。」呢番話隨即惹嚟全場掌聲，估唔到百度幫人喺網上搵嘢叻，仲可以幫學生賺學費。百度05年上市至今，股價急升近12倍，最新報每股348.12美金，家吓市值更高達119億美金，即係約928億港銀。