經過一輪篩選，終於選出12位有潛質的未來記者參加副刊記者培訓班，6位壇主各自將「武功秘笈」傾囊相授，他們又吸收到多少？
壇主：森美（商台主持）
主題：創意
香港人經常將「創意」掛在口邊，究竟呢樣嘢同愛情、甚至魚蛋檔有甚麼關聯？出名「鬼主意」特別多的森美就為大家解開呢個謎。
譬如有一日，當你行經旺角啲街頭小食檔時，見到平時「拮」開勁辣魚蛋嗰攤，竟然換咗個身穿比堅尼的魚蛋女郎，不停叫賣新推出的「冰鎮」口味，仲可以讓你用牙籤「拮一拮」試食，相信那一刻你都俾吸引去幫襯一串「冰鎮魚蛋」。
仲未明白創意係乜？就用多一個例子解釋吧。如果要大家用摺凳去比喻愛情，大家會聯想個故事係點呢？原來可以當成殺人武器，實行一招「愛你愛到殺死你」；又或者形容為「可有可無」的關係，有就坐一坐，無的就最多企一企。
森美運用這些天馬行空的例子，其實想為大家講明一個顯淺的道理，「創意」就是將一些無可能的事變成有可能，當中的過程就是「創意」。他笑說，當然會有高手的創作，亦都有「弱雞」的方法，那就要視乎在創作的過程時，大家用所付出的心機反映出來，他提醒大家切忌「hea」或眼高手低，否則永遠不會有新「創作」。
在創作的過程時，大家先要為自己定下要求，並且針對不同目標讀者的需要，然後就用最基本的方法──腦震盪「Brainstorming」震出個創作來！他畀一個「小貼士」大家，在創作時，可以在白紙上寫下想法，再揀選當中一至兩個最「意想不到」的點子加以創作。例如一個平平無奇的萬字夾，其實可以搖身一變成為食物、毛巾、甚至係一張廁紙。
森美解釋現今已變成多媒體的世界，在跨媒體創作時，應將媒體既定的特點發揮，達至「WinWin雙贏」的局面，而非將整個電視台搬到互聯網播放，就當作多媒體。
他又提醒大家在創作時，必須考慮目標讀者群，然後才決定創意的程度，特別是見工「關頭」，更要「博一博」。他更笑說：「今次講座保唔到你一定得，但好過唔知乜。」博得全場的掌聲歡送。
文：梁穎文（培訓班學員）
攝影：陳陶鈞、黃子偉
壇主評語：有創意，主題清晰。