為咗京奧舉行期間交通順暢，空氣冇咁污染，北京上個禮拜開始實施「單雙號」行車，而喺北京搞便利店生意嘅港佳控股（605），就特登搵咗間物流公司，成立咗單車隊喺京奧期間幫手補貨上架，咁就唔使掛住單雙號牌限制行車。
港佳財務總監鍾展強話，為咗確保貨源充足，北京嗰130幾間「好鄰居」便利店，一早已經入定貨，有啲面積較大嘅店舖，仲做埋貨倉，邊間便利店一唔夠貨，第一時間搵班「車隊」補貨，唔使怕塞車。
港佳本來打算今年將「好鄰居」數目增加到180間，但係北京呼籲喺6至9月期間唔好裝修舖頭，所以拖慢擴張步伐，估計到今年底只會開到約160間。