經濟學家從此多一個出路！花旗銀行前中國區首席經濟學家沈明高，呢個禮拜開始轉行，由銀行界跳槽去傳媒，不過，做嘅依然係首席經濟學家。咁邊間傳媒咁落本，請首席經濟學家呢？
據外電報道，《中國財經雜誌》喺佢嘅網站發新聞稿話請咗沈明高，係雜誌創辦10年嚟，第一次加設首席經濟學家呢個職位。沈明高同香港都有段淵源，佢喺美國史丹福大學攞到經濟系博士後，嚟過香港科技大學經濟系做研究，05年先加入花旗（中國）做經濟與市場研究部總監兼首席經濟學家。
《中國財經雜誌》創辦人兼主編胡舒立話，搵沈明高坐鎮，係想提升宏觀經濟新聞報道嘅水準，等啲報道可以挖得深啲廣啲，同埋增加多啲評論。家吓《中國財經雜誌》搵咗個經濟學家坐鎮，唔知香港嘅財經雜誌或報紙會唔會有樣學樣，請番個經濟學家呢呵？