港股受美股拖累下跌400幾點；昨日美國財長保爾森又再出招救市，但似乎未對美股有刺激作用，更彷彿跌過龍，但嘉賓認為只是正常調整，惟投資者信心依然薄弱，但嘉賓有信心8月港股會造好。
主持：楊慧玲 康：一中證券聯席董事黃偉康
楊：美國方面又再出招救市，但係未見得有效，仲急跌番好多，其實係唔係跌過龍？
康：我自己覺得係正常調整，不過整體投資者信心薄弱，見到當美國政府出招救市嘅同時，金融機構壞消息就不絕，抵銷咗救市效用；雖然調整得的確係多咗少少，不過整體上美股反彈勢頭應該未完。
楊：咁即係話港股可以被帶動？
康：係呀，雖然港股成交薄弱，不過沽壓都唔係好重；7月期指倉我認為都係好倉淡倉各佔一半，所以我相信好多大戶焦點都放咗喺8月份期指，如果以我計算8月份會造好嚟講，其實𠵱家推低期指，對8月港股係一件好事。
搶先貼股
神華33蚊有阻力
黃先生:我想問吓中國神華（1088），我平均價29.6蚊買入，上個星期佢上過32蚊我又無走到，睇下可唔可以再上高啲位。
康:神華投資收益比重唔大，所以可以預期盈利增長超過5成，巿盈率較中煤（1898）低，所以神華跌到落29蚊樓下，已經覺得係一個好合理嘅價錢，如果佢出中期業績係好過巿場預期，會引發一個較大嘅反彈。而去到32蚊至33蚊會有較大阻力，加上巿場太波動，所以唔可以太貪心，去到呢個位最好獲利沽出先，而09年煤炭股經營環境應該唔會好似今年咁理想。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股