雖然樓市交投大減，發展商少咗推盤，但真正豪宅始終有市場，除咗地理位置，設計裝修當然要襯番，咁香港發展商就要學吓新加坡公司喇！
新加坡上市公司喜敦同摩根大通分別佔55%同45%股權嘅格蘭芝路74號項目，搵咗法國設計大師PhilippeStarck創辦嘅房地產開發公司yoo興建豪宅，希望吸引東南亞包括香港嘅買家。yoo行政總裁ChrisBoulton話，由單位內櫳到公共空間，都由yoo設計，身在倫敦嘅PhilippeStarck當然亦有參與。PhilippeStarck有好多經典設計，香港半島酒店Felix餐廳就出自佢手筆設計。
喜敦首席營運總監兼執董劉易琼話，豪宅樓高16層共28個單位，其中兩個頂層複式每個樓面3600至4000平方呎。佢寄望大師設計可以叫高啲價，又話唔少港人鍾意喺新加坡買樓收租，一般要有景同方便，對頂層複式單位情有獨鍾，買嚟收租，回報預期5.5至6厘。