報名參選立法會，除咗本身要係選民之外，仲要畀五萬蚊做報名費；大部份參選人基本上都係畀支票，唔想攞住大叠現金周圍走咁危險。偏偏噚日報名嘅李卓人同佢嘅競選拍檔譚駿賢，就現兜兜攞住50張金牛去報名，工作人員要逐張check吓有冇假金牛，一時間報名現場好似驗鈔中心咁。
雖然譚駿賢同阿人一樣好高大，但輪廓好唔同，阿人自爆有街坊誤以為譚駿賢係佢個仔，俾街坊激死咁滯。有個名叫阮偉忠嘅教師噚日都報名參選新西，聲稱入過民主黨兩年但已經退咗黨，相信佢都係志在參選，五萬蚊報名費都凍過水。八方都要特別讚吓新西嘅報名安排，除咗提供地方畀助選團同記者等候，仲提供埋飲用水，透明度堪稱五區最開放，唔似得九龍東咁矯枉過正，連記者喺場內攞住張候選人傳單喺手，都話唔得。