一位讀者來電郵詢問韋基舜重印之《玉堂字彙》喺邊度有得買。照左丁山所知，書局有售，請到商務、三聯、天地等書局查詢。
一位讀者相信係鄧麗君fans，來電郵指出左丁山寫「歌后多悲慘」，講鄧麗君係因哮喘病而死，並非服藥過量，希望澄清。咁啱左丁山識得一位鄧麗君生前好友，佢哋兩位曾經一度往來甚密，無事不談，於是向佢問清楚。佢話鄧麗君係有哮喘，但死因係服藥過量，當年曾有報紙報導。無論乜嘢原因都好，鄧麗君客死清邁，令人感嘆。鄧小姐拍拖之時，佢位拖友嘅好朋友在「香宮」曾請過左丁山吃晚飯，鄧麗君與男友到場，男友介紹一句：「Teresa！」左丁山一時眼矇，認唔出眼前呢位嬌滴滴女士；竟然問：「Teresa，貴姓呀？」成枱人即時望住左丁山，𠵱家諗起都有啲面紅。
講到EdithPiaf，好幾位讀者來郵指點，話有一套電影LaVieenRose（粉紅色的一生），係Piaf嘅自傳式電影，佢嘅唱片在HMV有售。馬主N去完澳洲返嚟，來電話：「我坐國泰航機回港，聽機上歌曲，竟然有Piaf嘅法文歌集，令我喜出望外。我最近去澳紐英愛同杜拜睇馬買馬，坐過紐航、澳航、英航、愛爾蘭航以至阿聯酋航，佢哋嘅服務與機上entertainment完全同國泰冇得比，國泰機艙服務總監Quince值得一讚！」
咁畀面Quince？呢位大姐最近調職，唔管機艙，轉做企業事務總監，與佢嘅中大聯合校友程鼎一總經理拍硬檔，至於機艙事務，轉由佢另一位校友朱國樑負責。企業事務要由莊偉茵負責，莫非國泰預料有硬仗在前？
寫到呢度，收到陸離大姐傳真字條，告知威靈頓街公爵大廈二樓有一間法文書店，或有Piaf唱片出售。陸離大姐自細就喜歡法國文化，喜歡杜魯福電影，幾乎係杜魯福癡，當然對Piaf好有認識。跟住左丁山去陸羽飲茶，一坐低，枱上竟然有一張字條指點左丁山去公爵大廈法文書店買唱碟，夥計話係一位有心人吩咐交畀左丁山嘅。飲完茶立即去買回家聽吓先。估唔到一講Piaf，就有咁多知音人指點左丁山，真係多謝晒。