唔少人都覺ToyotaAlphard呢類大型MPV一定要請司機揸，事關要坐喺中排慢慢嘆嘛！不過，自早前同新一代Alphard350度過咗4日3夜之後，發覺唔只坐喺中排張OttomanSeat睇DVD電影夠嘆，原來操控亦比上代更好，易揸又跑得，尤其改良咗嘅6速波箱，唔大玩一輪都對唔住自己！
記者：鄭達基
攝影：陳陶鈞
模特兒：Tiffany（TheGroup）
若要數喺呢幾年入面曾經揸過嘅舊款Alphard，我諗十隻手指都數唔晒，豪華程度仲各有差異；可惜佢哋大都係用馬力只有220匹嘅3.0V6引擎，用嚟推動車重逾1.8噸嘅大型豪華MPV，可能會吃力少少，但啱啱推出嘅新一代Alphard350，喺改用具有DualVVT-i技術、兼馬力有274匹嘅3.5V6引擎後，性能表現明顯更上一層樓，耗油量亦有所下調。
喺4日3夜嘅長期測試旅程入面，我曾經揸住佢遊遍全港，當中更不乏荃錦公路、石澳道及東區走廊等指定試車路線，發覺新車喺任何路面環境下，車頭一台3.5V6引擎都好盡責咁提供源源不絕嘅動力，即使喺荃錦公路呢類陡峭嘅斜坡以高轉攀爬，引擎都唔會尖叫投訴。
至於點解我會話唔使司機揸，仲要隨時連女仔都揸得掂？就係因為新車配備咗可以增添更多駕駛樂趣嘅6前速半自動波，而車窗同兩邊門鏡都擁有超闊嘅視野範圍，加埋車尾倒車攝錄鏡頭，連啱啱考到牌嘅Tiffany都話睇位容易，就算咁大部都唔怕泊位會好難，咁你話係咪好易揸吖？
中排飛機椅 個個爭住坐
一句到尾，Alphard350唔只性能同操控表現更勝上代，就連車廂豪華程度都一樣有Upgrade。話說中排係獨立頭等Ottoman座椅，有齊腿墊同手枕呢啲設備，兼且頭頂仲有部10吋LCD屏幕同LED車頂照明系統，俾你可以好似身處戲院咁慢慢欣賞心愛電影，搞到班試坐過新車嘅朋友或同事，都爭住坐呢個位，感受吓坐喺Alphard入面扮老細嘅感覺！
其間發生咗段小插曲，有位生得高大嘅同事，因為唔夠人爭被迫坐後座，但因為通往後排嘅通道較窄，所以出入有啲難度，及後拍攝時再搵Tiffany試一次，發覺情況都係一樣，睇嚟廠方要改善吓個Design。外觀方面我就覺得大致同舊版相近，尤其係車身線條方面，好在廠方仲為佢加入唔少新設計，例如將頭燈同電鍍鬼面罩嘅Size加大，以及改用新款尾燈等等，望落比上代年輕好多，不過合金軨設計傾向成熟，同新車比較具有活力感嘅形象不太相襯。
規格
引擎：3,456c.c.V6DOHC
馬力：274hp/6,200rpm
扭力：34.6kgm/4,700rpm
傳動：6前速半自動波，前輪驅動
查詢：皇冠汽車（28661020）
