煲呔呢排頭頭碰着黑，連汪阿姐汪明荃都加入批評隊伍。本身係全國政協委員嘅汪阿姐噚日喺中總開完會，被問到點評價煲呔表現，呢期鬧煲呔較勁嘅係王永平，指煲呔施政又急又亂，連汪阿姐都認同，仲話好似外傭稅咁就搞到啲僱主好頭痕，唔夠深思熟慮。跟住佢仲主動講起副局長問題，鬧副局長梗係唔應該有外國護照，再鬧佢哋人工太高，對公務員唔公平，在場人士覺得汪阿姐嘅火氣同天氣一樣咁猛咁熱。
幫「生命熱線」錄音
一係唔講，講親都中嘅汪阿姐，噚日仲主動提到，煲呔月中喺立法會答問大會臨走前黑面，話咁做法唔多妥當，因為做領導人應該係解決問題而唔係發𤷪𤺧，覺得煲呔近期民調評分下跌都好正常。
汪阿姐除咗講得政治之外，原來都好熱愛生命。一直自付盈虧嘅「生命熱線」冇政府資助，資源唔夠，如果求助者同一時間打入嚟，每10個來電只能接聽1個。打得嚟求助嘅人都係好唔開心，汪阿姐出聲錄咗段打氣說話，畀輪候緊嘅求助者聽，大概係叫佢哋如果唔開心，試下用另一個方向去解決問題，積極面對人生。八方提醒廣大汪阿姐fans，想聽阿姐把聲扭開電視就得，千祈唔好打去求助熱線，以免影響真正需要幫助嘅人。