身為社民連成員嘅陶君行被拒入大陸唔係新聞，但估唔到連佢嘅競選海報都同一命運，過唔到關。話說今日報名參選九東直選嘅陶君行，早前委託間公司幫佢整六張街站用嘅大海報；公司人員格價後發現，香港整要成120蚊一張，大陸整就慳番40蚊，80蚊搞掂，即係前後慳到成240蚊，通脹壓力咁大，冇理由唔拎返大陸做嘅。
深圳海關冇作出解釋
點知噚日速遞公司話畀佢聽，六張海報喺噚日過關時被深圳海關扣起，入唔到境，而且完全冇任何解釋。
陶君行話張海報只不過得佢個嘜頭，再加句「為公義我肯搏」嘅字句，完全冇任何敏感字眼，就連社民連個logo都細到痹，唔知點解咁會被海關人員睇中，斷估唔會因為佢太靚仔啩？
今次totalloss，錢都係其次，最麻煩係佢噚日喺九東街站巡遊時，冇咗大海報襯托住，聲勢上自然失色。阿陶話明白追究無門，惟有下次醒水啲，唔好再貪平。佢唔希望今次係中央干預選舉嘅行動，話晒呢度係香港，要求嘅都係公平競賽。