內地深圳中小企業板成立4周年，據內地《理財周報（廣州）》報道，深圳中小板由04年成立至今，先後創造咗成千個富豪，當中最出名嘅係蘇寧電器董事長張近東，佢嘅蘇寧電器係中小板最高市值嘅公司，張總持有32.5%蘇寧股份，以噚日收市價計，賬面身家高達220億人仔，早排張總仲蟬聯內地上市民企首富。
家吓深圳中小板總共有261家上市公司，截至上個禮拜五計算，市值8352億銀人仔，較04年7月剛開板初期嘅329億比較，市值足足升超過24倍。
睇番香港創業板就失禮，99年11月成立到今年6月，八年半以嚟，市值只係升咗19倍，到上月底嘅1090億港銀。香港創業板成立時間長過深圳中小板，但市值只及人家嘅八分一，鬼咩，創業板成交咁少，唔少創業板上市嘅公司，都只係當佢係跳板，一有機會就轉去主板，淨係睇超人嘅Tom集團（2383）早幾年都捨創業板而去就知啦。