近排捲入老闆林小明婚變嘅江若琳（Elanne），噚日到九龍灣MegaBox出席卡通片《多啦A夢─大雄的新魔界大冒險》電影宣傳活動，佢今次仲為套戲嘅卡通人物美夜子配音。活動上Elanne同在場嘅小朋友玩遊戲之餘，又充當魔術師助手變魔術。Elanne話之前見到為大雄同多啦A夢嘅配音員，當時想叫佢哋幫自己錄手機嘅信箱留言，只可惜後來唔記得咗，白白錯失一次大好機會。
自稱問心無愧
江若琳又話喺多啦A夢法寶之中最鍾意時光機，因為喺唔開心嘅時候可以去到未來。但係記者問佢點解唔揀番返去之前嘅日子，等自己可以重新將工作做得更好，點知Elanne突然有感而發咁話：「我對得住人哋，每件工作都盡力做好，我問心無愧，呢段時間好快過，清者自清，唔係事實嘅嘢唔講啦！」
對於早前有傳Elanne所屬嘅公司賣盤，佢話唔知呢件事，況且呢啲係大人嘅事佢唔會過問，加上佢同公司仲有好耐合約。最後問到Elanne，佢喺老闆娘趙雪英宣佈離婚之後有冇聯絡？佢就話每年都係喺春茗先會見到老闆同老闆娘。
