幾年前網絡流傳一段「英超買波口訣」，其中有一句「阿東士維拉，輸到你瞓街」就令我求大俠印象最深刻。最近維拉喺圖圖盃面對丹超球隊奧丹斯，連續兩場開讓球下盤都可以話輸到人瞓街，但佢哋嘅左閘保馬喺賽事入面右足踝移位，預計有排唞，大家季初如果唔想瞓街就千祈咪掂呢隊波呀！
美爾保離隊 右閘欠奉
我求大俠之所以咁睇淡維拉，原因就係佢哋呢排個後防真係立立亂。上季季中知道咗美爾保會走之後，維拉都好似冇乜心機搵個右閘去頂佢個位咁，圖圖盃首回合嗰場波仲要搵埋格力加特拿客串「戥腳」，再加埋助攻多過防守嘅「得分後衞」拿臣喺中路，好難畀到信心人啫。
巴利入替 噓聲變掌聲
維拉呢期後面唔夠人大家都知，不過好衰唔衰，左閘嘅保馬喺圖圖盃次回合對奧丹斯就喺比賽初段右腳足踝甩骹受傷，𠵱家都唔知要唞幾耐。冇咗保馬，盛傳離隊而被球迷「噓到爆」嘅巴利都要客串左閘打埋場圖圖盃，都博番唔少主場球迷嘅掌聲，但其實巴利都去意已決，睇個勢呢啲掌聲都應該留佢唔住㗎啦。
話時話，上季維拉喺英超失咗成51球，呢個數字係前8球隊入面最多，仲同季尾護緊級嘅韋根睇齊，可以想像到唔齊腳嘅維拉後防仲會失得多。雖然維拉最近正式由布力般簽咗費度，搞掂咗蘇連遜、卡臣兩位門將離隊嘅問題，但始終嚟到新球隊點都要適應一排。費度好大口氣咁話下季維拉可以頭4名完成聯賽，我求大俠真係想勸吓費度，你認清楚你班後防隊友先好講嘢啦，到時你同邊個夾都未知呀！
