私募基金黑石（Blackstone），自從受美國次按拖累，股價一直冇乜起色。上個禮拜五，黑石得番17蚊美金。當年中投斥資30億銀美金，入股黑石近一成時，係以每股29.61美金買嘅，家陣即係跌咗43%，國家大嗱嗱30億銀唔見咗近半，中國人見到都心痛。
娶咗國寶伏明霞嘅前財政司司長梁錦松上年初到黑石返工，冇耐即促成中投入股呢單大刁，阿松亦做咗唔少中國人心目中嘅偶像，點知上年個市逆轉，11月時有人幫中投計數，當時已蝕7.4億美金，家陣恒指跌到兩萬三點都冇，黑石喺美國次按嘅震央，跌得仲甘，梁錦松喺中國人心目中嘅地位，亦跟住黑石股價直插，睇嚟阿松都要諗諗計。