藍天、白沙、音樂、足球，08年沙灘足球世界盃，周日喺法國馬賽落幕；巴西隊決賽5:3輕取意大利，連續3度捧盃一啲唔意外。令求大俠印象最深刻嘅，係為意大利射入第3球攞尾彩嘅小馬（馬勒當拿私生子），佢隻倀雞腳十足老馬82世界盃攞紅牌個動作，或者呢啲就叫遺傳啦！
踢完意丁冇班可落
巴西佬真係天生足球天才，挑波、窩利、頭槌乜都齊，踏沙過人十足水上飄，難怪30分鐘就送意大利5蛋。意大利喺對手放軟手腳下追番兩球；到24分鐘，後備球員、身披意大利10號球衣嘅小馬，禁區內施殘雞腳踩落個波入網，就咁追成3:5完場；呢個動作十足馬勒當拿喺82年世界盃，踩巴廸斯達下體被罰紅牌個動作，不愧係兩仔爺！
21歲嘅小馬身世都幾可憐，老馬4年前先肯認係佢老竇，同年兩仔爺第一次見面擁抱，不過之後繼續各行各路。背負老竇盛名嘅小馬足球路好崎嶇，喺拿玻里出道以後星運黯淡，上季打完意丁球隊維拿科就冇球會落班，今次出戰沙灘足球世界盃，只不過係大後備一名，分組賽對葡萄牙後備上陣入過一球，名副其實係「茄喱啡」。
沙足決賽不敵巴西
不過，小馬今次好歹都叫做參加過「世界盃」，仲係亞軍得主，如果我求大俠有個咁嘅仔，肯定開心到彈起！可惜，喺冇情冇義嘅老馬眼中，呢種所謂成就簡直係映衰馬勒當拿個名啦！唔怪得之，當日看台上出現卡林保、簡東拿等前球星，惟獨唔見老馬蒲頭啦！
點都好，我求大俠衷心恭喜小馬獲得職業生涯第一個重要錦標，同時亦希望佢盡快搵到新球會落班。只要小馬擺脫到老馬嘅陰影，做番自己自然踢到好波，話唔定遲啲有得代表意大利打2010世界盃㖭！