吳宇森執導嘅《赤壁》，內地票房衝破兩億人仔，連聯想集團（992）精神領袖柳傳志亦有捧場。據《中國經營報（北京）》報道，柳傳志睇《赤壁》唔係為咗台灣靚女林志玲飾演嘅小喬，只係為咗睇戲入面嘅英雄人物。
柳傳志話，細個時已經好鍾意睇《水滸傳》同《三國志》漫畫，尤其敬佩當中英雄人物嘅情義。喺《三國志》裏面，柳傳志最鍾意諸葛亮嘅角色，因為佢「滿腹經論、學富五車，卻落得『星辰隕落，秋風五丈原』的凄凉下場」。
柳傳志仲提到作為一個企業家，都要有英雄主義，咁佢本身當然亦有呢種英雄主義，即係「要有理想，把事情往大做，個人名譽、企業聲譽重於生命」，「做大事必定要流血流汗，要成功必然有犧牲、有付出、有委屈」，「所謂悲壯，就是犧牲局部成就整體」。雖然柳傳志講做大事要有所犧牲，但佢亦講必須擁有商業智慧，唔係只會做烈士。