港台節目《與CEO對話》最後一集搵嚟嘉華國際（173）主席呂志和，個訪問噚日播，戴住頂招牌cap帽嘅呂志和吸引力唔講得笑，除中大EMBA嘅同學，連中大校長劉遵義都有到。呂志和分享佢嘅經歷同成功之道外，仲好牙擦擦咁話：「好似真係冇乜試過（失敗）。」
小小挫折唔當失敗
話說呂志和嘅發迹史講到爛，學生轉而問佢有冇試過失敗，呂志和就答：「失敗呀？好似真係冇乜試過喎。」跟住佢補番句，「挫折就梗係有，失敗其實只係挫折，只要咬緊牙齦，就唔會全軍覆沒。」
話冇遇過失敗，咁呂志和又確係幾好彩，佢早幾年過大海去競投澳門賭牌，結果「爆冷」贏出，跟手佢仲注入嘉華建材，即係家陣嘅銀河娛樂（027），家吓呂志和持有嘅銀河娛樂同嘉華國際，市值分別有133億同75億銀。
至於佢遇過啲乜嘢「挫折」呢？華華睇番以前嘅報道，話佢十幾歲做食品生意時賺到唔少錢，但都係軍票，打完仗，桶金都化咗灰。
近啲嘅，喺01年嘅清明節，佢公司旗下一部混凝土車被人燒咗，更嚇人嘅係，有人送咗一副棺材去嘉華旗下海景嘉福酒店，寫明「呂志和先生收」，不過當時呂志和都好淡定，仲話呢啲嘢做生意梗遇到喎。