去年港股牛市「大時代」，無數甚少炒股的銀行存戶趕潮流入市，其中抽新股成為這類「即興散戶」最慣常入市活動，因當時抽新股算係比較易贏錢。
可惜今時不比往日，年內個別新股不惜壓價但求成功上市之餘，即使順利掛牌都難逃「破底」，不少新股股價甚至一直「潛水」，投資者見無利可圖，炒新股熱情頓時大減。上月首日掛牌即時跌破招股價1.30元兼持續「潛水」的重慶機電（2722），連保薦人瑞信都已悉售手持的13.7%股權，就知不少捧場客都炒到頭痕！
大戶似在收貨
其實，重慶機電係內地西部最大商用車零部件及電力設備生產商，在內地市佔率達60%，以質素計無理由咁曳。
重慶機電股價近期在低位徘徊良久，唔排除有大戶收集等上演「大龍鳳」，現價可吼，博先重上1元大關，買入後，跌穿0.70元止蝕。