北京奧運下個禮拜五揭幕，喺金融圈裏面，最心急、最渴望北京奧運快啲舉行，兼順順利利完成嘅，應該係港交所（388）上市推廣科主管霍廣文，點解？佢嘅主要工作係向香港以外嘅地方推廣，叫各地公司嚟香港上市。華華聽聞，佢已經plan好下半年嘅行程，其中當然包括返去偉大嘅祖國，搵多啲大企業南下。不過，實際行程係點？Sorry，連佢本人都唔係好清楚。你知啦，家吓大陸上上下下都全力搞好奧運，邊有人得閒應酬霍廣文，總之乜嘢事都要等奧運完咗先有得傾，所以家陣霍廣文最想係奧運快啲到，否則佢只可以喺香港等運到。
高層四出搵生意
近期市況波動，投資者唔敢入市，大市成交萎縮，港股噚日成交額就創16個月以嚟新低，點到霍廣文唔心急。其實呢年幾，港交所班高層已經周遊列國，搵商機，好似主席夏佳理就先後去過中東、俄羅斯、印度同埋以色列，行政總裁周文耀遠到山旮旯國家哈薩克斯坦都要去，你就知搵生意係幾咁難。
連特首曾蔭權都赤膊上陣，上兩個禮拜親率本港工商界代表團百幾人去東北三省，包括哈爾濱，吉林同遼寧，你話霍廣文又點會唔心急返國內兜生意。
李華華
電郵：mailto:[email protected]