數城中名人飯堂，最實而不華的是尚興，在娛樂版見報率之高，比在食版更甚。與尚興相連的兩興，是由尚興第一代始創人孫振光的哥哥孫振恭所開，兩家人由五十年代在潮州巷打對台到今日，適逢今晚係《溏心風暴》續集《家好月圓》首播，可能有不少人都對這家傳奇食肆，多了幾分戲劇化的聯想。
記者：張一豪
攝影：楊錦文、王文忠
名人食客
上環出位
約了尚興第二代主持人孫淑強，談談這家傳奇食肆發迹史，從中「偷窺」有沒有「風暴式」家族戲劇一面。「我老竇喺五十年代初嚟香港，當時就到大伯孫振恭潮州巷開嘅兩興幫手。當阿媽過埋香港後，就頂咗一個檔口仔興記自己做，賣炒潮州糕粿。當年阿媽好好嘢，自製甜豉油炒粿，仲首創加蠔仔增加鮮味，生意好到檔口八個位都唔夠坐，食客更索性排隊買外賣，最後更賣埋蠔仔烙、沙嗲炒河同滷水等。到七十年代，老竇開始買舖做小炒（尚興），同兩興喺潮州巷做到出晒名，雖然我哋成日來往，但亦唔會鬥到你死我活。八十年代，我哋兩家齊齊喺上環響朵，而尚興因做火鍋做到出晒位，一日更可賣過百斤手切牛肉。」
九十年代爭舖
「如果講鬥，九十年代初土發公司喺上環收地，安排小檔口搬去熟食大牌檔，為咗留住舊客，我同兩興都想在原區搵地方。94年時喺皇后大道西租舖，業主唔止比上一手加成倍租，仲同兩興傾，以收漁人之利，最後我哋更私底下鬥價，租咗現時間舖，兩興就租隔籬。如果想睇《溏心》潮州菜版，我諗你會失望，因為我哋兩家一直各有各做，無乜反目成仇，但同行良性競爭總會有。」
97年金融風暴對好多人來講是危，但對孫淑強來說是機。「金融危機後，好多人失業，於是我哋乘機請到幾個好師傅，令出品越來越好，加上傳媒同朋友畀面，名氣做得越來越大。」
高湯灼螺片約$250/片（a）
一隻三至四斤重的響螺要近千元，但只取最嫩肉，每隻最多可片四片，共一両多，以特製高湯灼，甜又嫩，富豪頭號最愛。
反沙金銀條$60（a）
考功夫之作，要將砂糖煮成膠，將熟番薯及芋條放糖漿上炒勻，離火推起沙面，外脆內軟。
生醃瀨尿蝦$80（a）
近年出位之作，將瀨尿蝦去頭洗淨，浸酒後用10多種調味醃8小時。入口味道先香、帶甜，再微辣。
芋茸鴨$50（a）
將滷鴨拆肉成絲，以馬蹄絲、冬菇絲、蝦膠等混入鴨肉，鋪上一層芋茸後壓實，落鑊炸，鬆化香口。
馳名滷水
尚興的競爭對手兩興，以賣滷水鵝起家，滷水鵝片咁出名都係全靠陳年滷水汁。他們的「滷水膽汁」有半世紀歷史，汁濃得來帶甜且充滿鵝香，加上每隔四、五天便再加入薑、八角、桂皮、丁香等材料再煮，以保持濃度，個汁唔靚都難。
滷水鵝片$85（b）
肉嫩入味，滷水香甜，原賣$68，因近年鵝價狂升，才加到$85。
a.尚興高級潮州菜館（28544557）
b.兩興潮州海鮮飯店（25413461）