阿媽教落，話之俾人話嘴刁，總之不時不食就無死，因為食材一當造，產量自然特別多味道好。行過生果舖，見到大堆黃澄澄芒果，唔只色水夠吸引，果香仲自動飄入鼻哥窿。芒果入饌，十個好味，香芒做雲吞，你又試過未？
記者：王震遠
攝影：梁細權、王文忠
模特兒：Christy@StageModels
百變香芒小食
自問係芒果Fans，有乜好過食自助餐，一次過食齊各款特色芒果甜品小食？話之出面熱到飛天，拎起支叉左拮右𠝹，嘆住冷氣質到自己飽一飽，嗰種凉到入心兼飽到上心口嘅滿足感，無得彈！推介「雅樂吧」香芒下午茶自助餐，逢周六、日及公眾假期3:00pm至5:00pm供應，收費成人每位$158，小童每位$118，呢個下晝見口痕？準時蒲頭一試以下精選菜式啦。（尖東麼地道72號香港日航酒店大堂旁雅樂吧/23134210）
呂宋芒最適宜入饌
「萬麗酒店」行政總廚劉瑞波話：「香港人最鍾意菲律賓呂宋芒，芒果入饌，九成都係用呂宋芒，因為較甜，中國人較易接受。」菲律賓夏天盛產芒果，色澤夠Sharp，做沙律當然掂，煎炒煮同樣出色，芒果夠醒胃，大熱天翳翳悶悶最啱食。
錦鹵香芒雲吞
錦鹵雲吞食得多，加芒果肉做餡第一次見，仲要有駐場師傅隨時候命，你一Order師傅即炸，保證新鮮滾熱辣。雲吞皮炸到黃金色，入口脆卜卜超香，鮮嫩蝦肉加芒果粒茸好夾。走勻全場，我敢講，錦鹵香芒雲吞，必試。
即叫即炸
芒果鮮蝦咯嗲
新鮮生果加芒果刨成球狀做底，擺靚隻泰國虎蝦，賣相一流，淋沙律汁、芒果汁加乳酪Mix埋一齊嘅咯嗲汁上面，撈埋嚟食，酸甜開胃。
迷你芒果薄餅
細細杯好的骰，芒果肉連雜菜連餅底，一齊焗八分鐘，滴少少芒果汁吊味，入口芒果味好重，一啖一個啱啱好，可以留番個肚食第二樣嘢，得咗！
炭燒三兄弟配芒果汁
見慣見熟三兄弟，魚蛋、墨丸同牛丸搽燒汁慢慢燒，重點係蛋黃Mix芒果粒做成嘅醬汁，肉夠香芒果汁夠甜，食到口水流。
絕配Match海鮮
夏天應份食海鮮，芒果同海鮮從來係絕配，今日Lunch未有着落？不妨一試「港畔餐廳」嘅SetLunch。我推介，虎蝦芒果沙沙最惹味，三道菜式成人每位$168，小童每位$148；兩道菜式成人每位$148，小童每位$128。
（尖沙嘴梳士巴利道22號九龍萬麗酒店4樓/27346660）
香芒龍脷柳咖喱芒果汁
比利時龍脷柳肉質雪白，鮮味彈牙，底層墊意大利飯，面頭鋪芒果肉，淋芒果汁令菜式更Colorful，靚到唔捨得食。
虎蝦芒果沙沙
比花蝦更大隻嘅虎蝦，剝蝦殼，用切絲春卷皮包到冚一冚，落滾油炸到金黃色，上碟點用芒果醬、魚露Mix埋一齊嘅沙沙醬，虎蝦足料彈牙，入口卜卜聲。
搞鬼邊爐配料
「美味廚」開業兩年，大把明星熟客，連濱崎步嚟香港做Show，都嚟呢度做慶功宴。「美味廚」主打火鍋，不斷創新火鍋湯底，包你唔會食厭，新火鍋配料有芒果釀豬肉丸，係，真係用嚟打邊爐㗎，味道仲好唔錯㖭。
（灣仔灣仔道165-171號樂基中心5樓/28668305）
芒果釀豬肉丸$48
常見火鍋配料，釀入芒果有噱頭，人手打製豬肉丸醃得入味。淥熟隊入口，豬肉丸爽口彈牙，我鍾意慢慢啜埋個「芒」心，好正。
香芒咖喱蝦球煲午市$68 晚市$88
海麻蝦連殼炸，加自製咖喱汁煮，香到痹，燒熱沙煲上菜風味十足。入口，咖喱香到爆，薯仔有咬口，蝦肉彈牙。
香芒蛋白南瓜蒸肉碎午市$58 晚市$78
南瓜墊底，中層蛋白，芒果碎加豬肉碎鋪面，南瓜蒸到腍一腍，蛋白勁滑，芒果蒸過一樣有果香，整體味道平衡得好Perfect。
