上星期日馬主Ｂ在《星島日報》睇到一段八卦料，引用自「某報網站」話范徐麗泰會出任馬會董事。馬主Ｂ即刻致電左丁山：「喂，某報網站即係邊張報紙網站呀？范太剛自立法會落莊，咁快就去馬會做董事？乜咁容易嘅咩？范太喺立法會就巴閉啫，對馬會、馬圈、馬場有過甚麼貢獻？某報網站是否有料到㗎？」
點知道咁多嘢呀？逐張報紙嘅網站去搜尋，好嘥時間喎，都係搵啲年青人做事最快夾妥，於是打個電話畀等緊大學招生放榜嘅學生Ｙ：「同我搵吓范徐麗泰做馬會董事呢條新聞出自甚麼網站？」學生Ｙ話：「我正在銅鑼灣街頭做緊義工，遲啲先至同你搵。」
馬會董事郭勤功今年滿七十歲，按例退任，郭先生係怡和集團老臣子，怡和在馬會董事會佔有一席，相信已有百年歷史，滙豐亦然，左丁山剛識得入馬場時，就知道馬會董事會有不成文規矩，裏面一定有四位近似當然（Ex-offico）董事，就係滙豐大班，怡和大班，馬會核數師（畢馬威）及馬會律師（孖士打）嘅高級合夥人（seniorpartner）、滙豐大班仲好多時係馬會主席㖭，最後一位就係蒲偉士爵士。
郭勤功先生退休，如果由范太代替之，馬會就會在百幾年歷史上，第一次在董事會內冇滙豐或怡和嘅高層在任，原本有會員以為鄭海泉會持續滙豐及馬會傳統嘅，但范太係人大常委噃，政治地位甚高，佢要做馬會歷史上第一位女董事嘅話，其他男士惟有退避啦，此乃一個時代之終結，代表英資勢力及影響力在香港逐漸淡出，由具中方背景人士頂上。
不過此消息仍然難以證實，要到八月初馬會周年大會後先至可能知道真定假。假如是真的，范太空降馬會董事會，其象徵意義仲大過紅籌大馬主榮智健公子於九十年代進入馬會董事會。
黃昏時分學生Ｙ卒之有電話到，佢話：「好易搵啫，講范太會做馬會董事嘅某報網站就係 http://web.hkej.com，即係信報網站，呢個網址比較奇怪，用web而唔用www。」信報原來已經開設一個網站，但信報自己都唔見有出housead.去宣傳，所以好多人都唔知。