香港客貨車市場一直被嚟自日本嘅T牌子所稱霸，但自韓國Hyundai代理引入全新H-1後，情況我諗會改寫。經過5日4夜嘅長期測試，發覺H-1唔止標準版唔到17萬起嘅售價有吸引力，擁有170匹馬力嘅2.5公升歐盟四型（EuroIV）柴油Turbo引擎，加上容量超大嘅尾廂，絕對有條件將日本對手擊敗！
記者：鄭達基
攝影：陳陶鈞
模特兒：Carey
170匹歐四偈運轉靜
代理向用家推介H-1客貨車時，除標榜佢嗰台同樣係全新嘅2.5公升CRDi柴油Turbo引擎，符合現行最新歐盟四型環保條例外，比同級車嚟得更強嘅170匹馬力同40.0kgm扭力，亦係重點之一；年初首試時我曾初嘗佢嘅威力，但經過今次5日4夜嘅長期測試後，更發覺佢除爆炸力強外，運轉時仲要比對手寧靜。
取車當日，由代理位於長沙灣嘅維修部出發，取道龍翔道及清水灣道返回位於將軍澳嘅公司，沿途正宗多彎又路斜；嗰陣我刻意踩深些少油門，睇吓佢喺斜路嘅表現究竟係點。哈，果然不負眾望，只要當引擎處於2,000-2,200rpm時Turbo就會介入，背脊突然有股推背感湧至，逢車過車（所指當然係嗰啲3.0公升級、兼同樣係用歐四偈嘅日本對手）真係好Easy。
仲有一個Point，就係H-1用嘅係5前速手動波箱，升波拖波任你自己揀，起步加速爽快都拜此所賜；至於運轉寧靜呢個課題，你肯定會話佢台偈放喺車頭，咁就梗係靜啦！無錯，你咁講的確有道理，但如果部車嘅隔音功夫做得唔好，同埋台偈本身唔靜的話，咁又點會成事呢？
MPV造型吸引度高
話咁快就返到公司，咁啱朋友打嚟話夜晚有嘢要搬去新屋，咁就梗係自動請纓幫手；朋友見到H-1嗰陣，直頭嘩一聲叫咗出嚟，佢話諗唔到部車個尾廂竟然大成咁。睇番廠方提供嘅數據，原來尾廂深度有1,585mm，而高度亦達1,350mm，連地台亦屬偏低水平，唔只可以運好多貨，更重要係搬運尾廂貨物嚟得更方便；當然，左右雙趟門都係其中一個賣點啦！及後，開車前往朋友新居，沿途佢不斷讚車廂陳設簡單有實用性，而私家車Style嘅中控台設計，有埋大面板音響絕對係吸引。不過，我就覺得前排話就話載三個人，但中間一個始終都係會俾中控台頂住隻腳，想舒服？坐後面會好啲。
外觀方面，個人認為跟日本同級對手相比都算唔差，因H-1用咗歐洲大型MPV嘅造型設計，有大頭燈之餘仲有超大Size鬼面罩，用作測試嘅呢部頂級Deluxe版，更配備咗16吋合金胎軨，咁你話佢個Look又點會唔吸引吖！
規格
引擎： 2,497c.c.直4柴油Turbo
馬力： 170ps/3,800rpm
扭力： 40.0kgm/2,000-2,500rpm
傳動： 5前速手波
查詢： HyundaiHK（34288288）
