近期股市時升時跌，搞到小妹都唔敢貿貿然入市，費事損手爛腳渣都冇埋。熱衷於各類投資嘅同事祖兒姐見勢色唔對，近排轉而向名錶市場進攻，仲入咗幾隻古董勞力士，當係命根咁對佢哋呵護備至。嘩，仲緊張個男友，使唔使咁誇。
祖兒姐話，佢個古董鐘錶專家老友ThomasMilani同佢講，呢啲勞力士名錶勁有升值能力，一個轉手就閒閒哋執萬幾蚊，如果可以放幾年時間待價而沽，升值更多唔係難事。其間當然要好好保養好隻錶，咁先可以keep番個價高啲，否則有乜冬瓜豆腐整花咗，會影響升值潛力。
祖兒姐話，上禮拜趁Thomas開古董錶展踩場問佢教幾招保錶大法。
Thomas話，最基本嘅當然係戴嘅時候要小心啲，唔好刮花佢，唔戴嘅時候同樣要好好保護佢。第一招，香港嘅天氣非常潮濕炎熱，所以要先將隻錶放入膠袋入面套住，再放入一個密封膠袋內，仲要放喺亁燥嘅地方，如果唔係潮濕天氣會令隻錶氧化，除咗影響錶嘅顏色之外，嚴重嘅甚至會令錶面側邊嘅夜光體跌出嚟。第二招，避免將隻錶長期暴露喺光線下，因為陽光同樣會令到錶面嘅顏色褪色，甩色錶個價好極有限。
電郵：mailto:[email protected]
逢周六、周日刊出