一代才女林燕妮曾經戀上有婦之夫黃霑，受千夫所指，最終因為第三者出現而分手，結束14年情。歷盡情愛之苦的林燕妮，在最後一輯《向世界出發》中，重遊當年禪修的韓國華溪寺，坦言當日被黃霑拋棄，一直心生不忿，但禪修令她得以開悟。林燕妮說：「乜嘢都係笑話一場，有乜咁大件事？俾人背叛嘅包袱，最後跌落嚟冇咗。」 撰文：戴彩煥
南北韓分裂超過半個世紀，無數家庭被迫分離。弟妹、父親相繼離世、受盡生離死別之苦的林燕妮，在最後一集《向世界出發》中，由南韓首都首爾向北出發，到最接近北韓邊境的烏頭山統一展望臺，眺望南北韓停戰協議後，南韓戰俘重獲自由的「自由橋」，以及分隔南北韓的臨津江。一江之隔，南北有別，兩地人只能於春秋兩祭，在這裏遙望對岸，以表思念之情。
林振強電話求救
生離死別不由人，林燕妮從沒想過在短短幾年間，要經歷一連串家庭悲劇，她的兩個弟弟林振強和林震剛，在03年短短個多月內先後因為淋巴癌逝世，父親又於05年離開。受盡生離死別之苦，林燕妮感慨無限：「我家人咁短命，一個二個咁走晒，我係冇得控制，惟有佢哋病嗰陣盡量對佢哋好啦。」
身為家中長女的林燕妮，跟著名填詞人的大細佬林振強感情最要好，當日林振強打電話向她求救一幕，林燕妮仍歷歷在目：「有一日電話響，係我細佬把聲『家姐救我一命。』佢話佢有淋巴cancer，要捐骨髓，如果要捐，可能性最大就係兄弟姊妹，我同細細佬（林震剛）都得，結果再驗就發覺原來細細佬都有cancer。」
喪親之痛今天說來仍然錐心，愛情傷痕卻在禪修後一下子放下。沉溺愛情的林燕妮戀上有婦之夫、已故填詞人及作家黃霑，受盡千夫所指。林燕妮說：「我哋拍拖8年，我從未要求過佢離婚，當我鍾意一個人嘅時候，我就冇乜嘢考慮，拖吓拖吓，我覺得佢有啲唔尊重我喎，咁我係邊個呢？」最後，林燕妮與黃霑14年戀情因為第三者（指黃霑妻子Winnie）介入而畫上句號，林燕妮說：「係佢自己走先，佢有第二段感情，我其實有小小唔忿氣，因為我成世只有人追我，我未曾俾人掟過，只有掟人，我心諗，你又唔係靚仔，又唔係有錢過人，點有資格掟我？」
逐個包袱掉咗佢
懷住半生情債，林燕妮於一個偶然機會接觸到佛學，1999年她放下香港一切到韓國華溪寺參加為期6星期的禪修，終把困擾自己多年的心結解開。今次林燕妮再訪華溪寺，親述她當日禪修的刻苦生活之外，更談到她通過禪修的得着：「我喺度坐坐坐（坐禪），坐到第4個禮拜，我忽然諗起嗰個人個名（黃霑），我咭一聲笑出嚟，覺得乜嘢都係笑話一場，有乜咁大件事？即係自己心生不忿，同好傷心俾人背叛個包袱，最後跌落嚟冇咗，原來禪修唔係幫你解決問題，係幫你逐個逐個包袱掉咗佢。」
話你知：洗衫打掃刻苦潛修
林燕妮的師傅是華溪寺的前任住持、已故的崇山大禪師。為讓有心學佛的人體驗寺院生活，華溪寺每年都會舉行兩次禪修，每次為期三個月左右。進行禪修的禪子要過僧人一樣刻苦生活，無論起居飲食都是最基本，沒有任何物質享受。禪修生活非常有紀律，寺院內一律禁語，每晚10時前睡覺，凌晨3時半起床，每日除坐禪八個半小時外，更要分擔寺院內洗衫、燙衫、掃地及洗廁所等粗重工作。另外，每次食飯時間只有七分鐘，每餐只有白飯、菜湯、韓式泡菜、青菜、芽菜和醃蘿蔔，進食時不能發出聲音，碗筷碰撞聲音亦要減少。
