有玩開MSN的都會明白突然開唔到MSN的不安和焦慮，作為目前電腦中最重要的溝通工具，MSN的確花臣多，特別是那些得意有趣的Messenger公仔，用來表達那刻的心情，感覺實在貼切。今次麥當勞就用上人人愛玩的Messenger做主題，推出HelloKittyMessenger公仔，隻隻表情趣怪，再加埋軟硬特別版，看來又將有大堆身邊人逼你食麥記了。
記者：許維雅
攝影：林栢鈞、譚盈傑
今次以Messenger為題的HelloKitty，最大吸引力必定是每隻不同古怪表情，單眼、流汗、扮嬲等表情同樣是前所未見，雖然有KittyFans話睇唔慣，要些少時間適應，但大部份人卻覺得跟之前相比多了份新鮮感。想得到不同款式的公仔，只要在指定時間購買任何食品滿$17，即可加$10換購1隻，最多可換購兩隻。至於想得到軟硬特別版，大家必須購買$300限量版套裝，套裝包括全套16隻HelloKittyMessenger、兩款「HelloKitty×軟硬」別注、價值$120的餐飲食券及HelloKitty購物袋一個，有得食有得玩，計落都抵。
HelloKittyMessenger限量版套裝
隻隻HelloKittyMessenger都咁得意，今次就找來Angelababy、JJ同唐素琪選出邊隻至愛推介、大談最愛卡通人物以及最想麥記推出的得意公仔。
最愛卡通人物：HelloKitty、史廸仔
「我好鍾意HelloKitty㗎！之前都有儲過麥當勞出嘅HelloKitty，最鍾意每隻都唔同顏色硬膠系列，我仲貼晒閃石落對眼度，好靚㗎！但如果麥當勞可以出史廸仔就好喇！我鍾意嘅話，都會專登儲齊一套。我唔使搵人幫手儲㗎！因為我本身好鍾意食麥當勞！今次呢套Messenger系列都好靚，我最鍾意Imissyou，意思浪漫，呢句Message同邊個講都得！」
最愛卡通人物：多啦A夢、花師奶
「之前都有儲過麥當勞出嘅公仔，好似生肖同廸士尼系列。其實我好想佢哋出花師奶，因為最近我成日睇呢套卡通片，覺得好搞笑，好鍾意佢！若果想儲齊全套，我一定唔會上網買畀錢人賺，寧願叫朋友幫手儲。今次最鍾意呢對軟硬HelloKitty，加上我本身鍾意軟硬，佢哋兩個拍埋就好有吸引力。」
最愛卡通人物：LittleTwinStars、Tuxedosam企鵝仔
「有時見到麥當勞得意嘅公仔都會換，但𠵱家就好少儲齊全套。我鍾意嘅卡通人物好難搵，好似企鵝仔咁，如果麥當勞出就好。不過細個喺英國讀書時都試過儲齊全套12隻Snoopy公仔，隻隻手掌咁大立體Size硬膠，真係好靚！為咗套Snoopy，日日食麥當勞，好難忘。今次套MessengerKitty好得意，每隻有唔同Message，可以買嚟送畀人。」
街訪：$300嚇怕粉絲
軟硬同HelloKitty的粉絲人數一向驚人，想知今次套裝有冇炒賣潛力，就先要知道今趟MessengerKitty反應熱烈與否。結果顯示眾人首選必然是軟硬特別版Kitty，可惜大部份人一聽到要買$300套裝先可以換到都立刻表示要考慮，似乎想打退堂鼓，寧願加$10換自己想要的MessengerKitty。有Kitty粉絲更表示麥當勞出得太多，開始冇乜驚喜。
Tony：「最得意係軟硬呢對HelloKitty，但我一向冇乜興趣換呢啲公仔，所以多數都係幫人換，因為我都幾鍾意食麥記。」
Kaye：「我係軟硬Fans，所以都好想換軟硬呢對HelloKitty。不過$300咁貴，仲夾硬要埋其他16隻，要考慮吓。」
Mike：「每隻$10都唔算貴，食開麥當勞見到啱都會換，但要$300先換到對軟硬Kitty，好似貴咗啲噃！」
Christine：「呢套MessengerKitty得意之餘有用途，咁平一定會換。不過軟硬呢對太貴，而且都冇乜特別啫。」
查詢電話：28807300
（ http://www.mcdonalds.com.hk）
（換購地點並不包括海洋公園、沙田馬場及跑馬地馬場。）
同場加映：J-01xHelloKitty齊齊變臉
今個暑假，HelloKitty的確再次成為卡通人物頂頭大熱，主因當然是HelloKittyBlackWonder展覽觸發，各方面全面配合催谷。加入戰圈的就有潮舖J-01，推出兩件以BlackWonder主題的PrintTee，為配合黑色陰森的展覽題材，HelloKitty的表情圖案同樣古怪有趣，跟以前細眼貓仔的正經樣貌有別，齊齊加入變臉一族。稍後，D-mop亦會推出HelloKitty產品，大家緊記密切留意。
J-01（28080501）
銅鑼灣百德新街57號地下B舖