教女與襯衫，相同處是要精煉，同樣靠自行摸索浸淫，潮媽徐濠縈（阿徐）自行摸出一套要多與女兒康堤（包包）一同玩、一同學習的心得，過程中要軟硬兼施，不能過份溺愛並要賞罰分明。阿徐又表示由於丈夫陳奕迅（Eason）為口奔馳，故照顧包包的時間，她便遠超出Eason，不過雖然兩父女見面時間不多，但包包一見爹哋回家，即如有運行般表現得十分開心。 撰文：梁錦貞
徐濠縈與陳奕迅的女兒康堤不經不覺已3歲零8個月，心野愛玩愛蒲的阿徐表示誕下女兒後，心態脾性有微妙改變，她日前接受訪問時說：「諗番起好多年前，沈嘉偉同我講快啲生啦，有咗細路人生態度會好唔同，當時唔明佢講乜，就算陀住包包都唔明，到生咗個女出嚟，睇住佢長大，𠵱家終於明白。」
堅持湊女返學
阿徐續說：「喺我心目中𠵱家排第一位一定係個女，我嘅生活表都會以個女行先，冇錯我仲係好鍾意出去玩，我認為呢一代嘅媽咪點都要有自己嘅生活，要平衡吓，不過我一定會等個女瞓咗覺先出去，就算玩到幾夜，第二日我都會起到身湊個女返學，陪佢上興趣班。以前我哋成日即興去旅行，包包出咗世之後真係冇幾何，淨係去過兩次日本，真係好微妙，一上機就好掛住佢，見到人哋啲小朋友又諗起佢，好natural好神奇。好明顯戾氣少咗，𠵱家對住狗仔隊都好少發火。」
阿徐坦承陪伴照顧包包的時間，與Eason佔的比例是9比1，她說：「冇辦法，佢要搵食，肯定係非一般嘅爹哋嚟，咁我做到幾多就要盡量做，包包細啲嗰陣真係淨係黐我，佢哋兩父女見面時間冇錯係唔多，唔好講話Eason要出外工作，就算喺香港同個女嘅時間都唔夾，佢仲瞓緊覺包包就返咗學，但係包包好似越大越明白。
「如果有日兩父女都喺屋企，爹哋可以抱吓佢、同佢玩吓、講吓故事畀佢聽，佢會好開心，好似嗰日有運行咁，可能因為少見，好自然個女會驚爹哋，唔怕我，好似如果一家三口食飯，包包成日食食吓走咗去玩，我叫佢返嚟佢就頭岳岳冇反應，Eason一句返埋嚟坐，佢就即刻好乖咁食埋餐飯。」
深具語言天份
阿徐指教女對她來說是一門新學問，她的心得全是慢慢摸索回來，她自評有80分，她說：「我覺得自己套方法真係幾work，差嗰20分係我唔夠耐性，成日想個女快啲學識某樣嘢、快啲做完成版功課。」阿徐指自己會與女兒一同體驗、一同經歷、一同學習，她說：「例如包包學溜冰，第二啲家長擺低仔女學就走咗去，我會等佢學完，之後再陪佢一齊溜多個鐘，好自然佢真係上手得快啲，好多媽咪見我呢個方法真係work，𠵱家包包學乜，佢哋都會跟住幫佢哋嘅仔女照報呢啲興趣班。」
這一代的父母普遍都給子女填鴨式興趣班，以發掘子女的潛能，阿徐的策略是：「係想令佢動靜皆宜，全面性一啲，但底線係周末周日一定唔會要佢再學乜學物，大家都要take個break。」
阿徐續說：「𠵱家包包有學芭蕾舞、溜冰、唱歌、phonics（英文拼音），最近我發現佢英文好似叻過中文，就畀佢學埋中文認字同普通話，佢前一排無端端用普通話同我講『媽媽，我愛你』嗰吓真係冧死。我同包包啲老師傾過，佢哋普遍都話包包好明顯喺語言方面好有天份、記性、吸收力又好，𠵱家佢已經可以睇7歲小朋友睇嘅故事書同寫短文。」
反對施以體罰
賞罰分明、守承諾及堅持不體罰，也是阿徐教女的秘訣，她說：「教女心腸絕對要軟硬兼施，唔可以縱佢，好似有時我出外工作，佢攬住我對腳唔畀我出門口，我都要硬住心腸唔好就佢，冇理由佢次次喊我就留番喺屋企，同埋如果佢好快做完功課、寫好一版字，我會獎佢貼紙同埋畀佢睇DVD，相反如果佢寫吓唔寫我會同佢講數，會困佢一個人喺房，呢啲叫做quiettime同埋naughtycorner，等佢知罰佢係因為佢唔啱。
「仲有應承咗小朋友嘅嘢一定要兌現，好似包包試過一次好快做完功課，我話會帶佢去廸士尼，自己講完都冇咗件事，但係佢會提番我，對小朋友千祈要守信用。另外，就算包包點曳我都唔會打佢，出世到𠵱家一次都未試過，我哋嗰代邊個唔係俾父母打大，我好清楚你出手打佢，只會令佢怕你同憎你。」
兒女心聲：包包眼中的靚仔爸爸
阿徐在訪問中指女兒包包phonics最了得，早前在其好姊妹何志恩開設的playgroup開幕禮，記者與包包玩成一片，在牆上塗鴉一番，記者叫包包寫下媽咪名字（Hilary），不知是否人多看着，包包顯得緊張，一筆一筆寫下「Hin」後，知道串錯字即突然停手。
演唱會常客
記者又以英語問包包：「DoyouknowEasonChan?（你認識EasonChan嗎）」包包精靈回答：「Yes,He'smydaddy.（認識，他是我爹哋）」記者：「IsEasonagoodboy?（EasonChan是否好男孩）」包包：「Heisaman.（他是個男人）」記者：「Ishefat?（他肥嗎）」包包：「No!（不）」記者：「Ishehandsome?（他靚仔嗎）」包包：「Yes!（靚）」
再問包包關於「毒后」AmyWinehouse，她竟然說：「Sheispretty!（她很靚女）」還有包包也是演唱會常客，阿徐指每次帶她去演唱會場地，她總是以為去聽爹哋演唱會，對Eason去年個唱一幕火辣性感舞蹈，包包看後會問：「Whyaretheysosexy?（為何他們那麼性感）」現在的細路，認真估佢唔到！
育兒心得：多元興趣 發掘個性
阿徐說過她教女的要訣是賞罰分明，且對女兒的承諾必須兌現，例如她扭計時要與她「講數」，她乖乖時，如準時做完功課則要「大解放」獎她貼紙，或讓她看心愛的書籍及DVD，她說試過一次包包乖乖做完功課後，女兒即飛快自行拿起AmyWinehouse的DVD放入機，載歌載舞一番。
不過一向愛嗲媽咪的包包，有一次發現媽咪因工作久久未回家，即自行致電給她，扭計要阿徐立即歸家，阿徐惟有騙她正在買欠她很久的HelloKitty貼紙給她，怎料包包說：「我可以唔要啲貼紙，𠵱家淨係想要你！」
遺傳「有型」DNA
阿徐又強調希望女兒包包興趣要全面化，更不諱言希望女兒會遺傳父母的不一樣「有型」DNA，所以一方面讓她多看廸士尼益智童話故事書，她說：「等佢可以跟同學對嘴嘛，但又唔需要百分百正規，發掘佢有個性、wide嘅一面都唔錯吖。」故在父母耳濡目染下，包包也愛聽AmyWinehouse、Mika及椎名林檎的歌，但數到最愛，始終是白雪公主及Cinderella。
媽咪貪靚成精，未到4歲的包包的品味又如何？阿徐說：「咁細個未睇得出，暫時逢係粉紅色同閃閃令嘅佢都鍾意。」
包包的至愛：
《AliceinWonderland》故事書
《FaithTheCow》故事書
《Dandelion'sDay》故事書
《HighSchoolMusical》DVD
《阿拉丁》DVD
AmyWinehouse/MikaCD
