葉翠翠突然變成股壇狙擊手，炒股發達買3,000萬豪宅，這個童話式傳奇一時成為熱話，就連其舊愛李逸朗也難以置信，不單止沒有強撐葉翠翠，反而表示睇雜誌才知葉翠翠識得炒股票，又謂現在看到她的新聞好似名媛新聞一樣，顯然嘲諷舊愛。
葉翠翠昨日應邀到深圳出席VegasBeauty旗艦店代言人活動，翠翠瞓身賺外快相當識趣，以一身低胸裝亮相，胸部線條突出，席間大會安排一名外籍猛男，脫去外衣赤裸上身攬着翠翠纖腰合照。
早前葉翠翠被傳媒踢爆購買3,000萬買豪宅，其後她多次辯稱是炒股票有斬獲，但遭全城反擊，之後還惹來被包傳聞，雖然葉翠翠堅持死撐，不過事件越描越黑，就連舊愛李逸朗（阿Don）都嘲諷她。
沒有聯絡
阿Don昨日在九龍塘出席麥當勞宣傳活動，對於舊愛葉翠翠解釋因炒股有所斬獲，買3,000萬豪宅，事後又有傳聞被富商所包，問他與翠翠拍拖時對方可有教他炒股？阿Don坦言：「我都係睇雜誌先知佢識炒股，佢冇教過我喎，不過炒股確實係一個搵快錢嘅好方法。」
對於葉翠翠被指有富商包起？阿Don說：「早前我睇新聞都成日見到佢同唔少有錢朋友一齊，唔覺得奇怪，不過我就唔信佢會俾人包嘅，我同佢都好耐冇聯絡，𠵱家睇佢啲新聞好似睇名媛嘅新聞咁囉。」
拒愛老外
此外，葉翠翠昨日在活動上與外籍型男親密合照，她笑言：「其實一早都知佢會攬住我，不過我感覺到佢好濕、好大汗。」至於日後擇偶會否老外優先，葉翠翠說：「喺英國讀書時都有鬼仔追我，佢好浪漫，仲一日一支花，又整卡送畀我，但思想上係溝通唔到㗎，幾靚仔都冇用，有得選擇都揀中國人。」
採訪、攝影：卓寶花
