擁有42吋長腿的萬綺雯，得天獨厚，從未走樣，一對長腿，令她自豪，加上其苗條身段，107磅的她簡直fit到漏，當年選亞姐時的小肥妹，如今與babyfat拜拜，更顯其成熟韻味。可是，不要觀其鋼條身形，其實內裏多處骨節曾受傷，有段日子令她痛不欲生，在接受治療間，唯一運動便是游泳，想不到全賴游泳游出健康。
撰文：陳寶明
萬綺雯是89年亞洲小姐亞軍，出道至今最大樂趣便是演戲，也是為了演戲令她飽受痛楚煎熬，98年她拍亞視劇集《我和殭屍有個約會》時試過跌傷腰骨，又試過吊威吔斷了肋骨，腳踭又生骨刺，這位骨感美人認真多災多難。
拍戲多年的代價是一身傷，萬綺雯日前說：「我拍《我和殭屍有個約會》有好多動作場面，因為跌傷過，搞到坐骨神經痛，脊椎骨軟骨移位，經常撞到神經線，就會好痛，痛起上嚟左邊手腳都會痛，試過夜晚瞓瞓吓痛到醒咗喊，又因為吊威吔吊到肋骨斷咗，腳踭又生骨刺。」年紀輕輕便受到骨痛之苦，筆者越聽越心寒。
靠中醫治骨痛
從此萬綺雯不能再做劇烈運動，唯一能做的便是游泳。受傷之前，萬綺雯最愛打壁球、打羽毛球等，但受傷後的活動能力受局限，她說：「我去睇醫生睇咗幾年都未好，覺得自己忍痛能力好高，一直醫唔好，都冇辦法，後來我結婚，老公識得一位中醫骨科，佢係專科人士，以前係軍醫，我照過Ｘ光，佢教我要游水，因為水中有浮力，關節之間冇壓力，又可以做運動，令到四周肌肉有力量先能夠保護到條腰骨，令佢唔好再移位，醫生又幫我推番正條骨，游水真係對病情好有幫助，而且又係健康運動，𠵱家變成我最鍾意嘅運動。」
現在的萬綺雯已不再受骨痛之苦，因為她的坐骨神經痛已康復，不過當然要作適當保護，不要劇烈跑步或舉重，尤其不能拿較重的物件，如今拍戲她也特別小心，若要吊威吔她一定審慎考慮。
夏天萬綺雯每周會抽兩至三天去沙灘暢泳，因為她較喜歡大自然的海灘，有時會陪家姐及姨甥仔去玩，不過貪靚的她怕曬黑，故不會在烈日當空下暢泳，她多數選擇黃昏時分才去游水，若是繼續陽光普照，她便防曬用品不離身，一上岸便不停補充。
腰痛無礙生仔
結婚八年的萬綺雯一直未有做媽媽，她的腰骨曾經受重創，真令人擔心她的生育大計可會受影響？一旦懷孕腰骨如何承受如此大壓力？她說：「醫生話我好番，相信冇事，只係要小心保護條腰，做媽咪都OK，不過我鍾意玩人哋啲小朋友，有仔女責任好大，30歲之時我想過生BB，不過過咗又唔想，可能我自己好論盡，到𠵱家都未準備生BB，我同老公有默契，我哋過咗七年之癢，好平安，兩個來自唔同世界嘅人，一定要識得包容大家，識得妥協。」
萬綺雯除了游泳換來健康，她在飲食上也是以清淡為主，02年開始她信奉佛教，故不再殺生，她說：「食素對身體好，我以前成日有小毛病，好容易感冒、水腫同扁桃腺發炎，因為以前食肉多，體內有好多毒素，自從食素後抵抗力好過以前，連老公都覺得我好咗，冇晒小毛病，人都精神晒。」萬綺雯一向崇尚自然，連飲食習慣也一樣，不味精、不味濃，最後當然是不要肥。
攝影：葉君海
髮型：RayMork（Chin-G）
素菜食譜：齊齊炮製健康齋
萬綺雯由02年開始信奉佛教，改變了飲食習慣，由雜食者變為素食者，有很多人覺得素食欠缺營養，但她覺得素食者同樣吸收足夠營養，更教大家煮健康齋菜，可以像她一樣保持苗條。
-金黃生炒骨-
先將蓮藕蒸熟，切方條形，加鹽、糖、胡椒粉和生抽調味，醃一會，沾炸粉漿落鑊炸至金黃色後盛起，炒三色椒加生炒骨汁，將已炸好的蓮藕一起炒勻，最後加入菠蘿炒勻上碟。
-雞蛋蒸豆腐（圖）-
先將豆腐攪爛，然後加鹽和雞蛋拌勻蒸熟．再淋上煮過的調味（油、糖、豉油）即成。
-南乳炒素菜-
大豆芽半斤去尾、青豆角二両切段、豆腐亁兩件切片、冬菇三隻浸軟切絲、紅蘿蔔數片、南乳四分一磚、薑兩片、糖一茶匙、生抽一茶匙。先將大豆芽等材料略炒待用，加少油爆香薑片及南乳，再將材料倒入，加少許水、生油、糖及紅蘿蔔片煮熟上碟。
心水齋舖
美食少油健康
（佐敦、北角三德素食）
萬綺雯最愛泰式黃魚、雞軟骨炒芥蘭、冬瓜盅，小食則有脆鱔，脆鱔用冬菇製成。該店以少油及少味精夠健康見稱。
開胃醒神沙律
（尖沙嘴喬妃齋舖）
鍾情蘇杏璇主理齋舖的蜜汁雜菌、南乳吊燒鴨、金銀膶腸及頭盤柚子雜果沙律，萬綺雯讚開胃醒神。
愛吃蜜汁叉燒
（元朗大力齋廚）
綺雯喜愛蜜汁叉燒、上湯雲吞，一般家常小菜。
靚湯推介：清湯滋補養生
萬綺雯有每日飲湯的習慣，雖然她是素食者，但她的素湯絕對不比一般肉湯遜色，而且清淡有益，材料也甚簡單，正好適合繁忙的都市人。
木瓜湯
材料：木瓜一個、南棗兩粒、雪耳、腰果、合桃各半碗（煲兩個半或三小時）
生果湯
材料：去心雪梨、去心蘋果、無花果三粒（用熱水先浸）、南北杏、雪耳、生薏米、淮山（煲兩小時）
魚翅瓜蓮子湯
材料：魚翅瓜連皮煲，開邊蓮子浸水半小時，淮山、素雞肉、果皮一片、蜜棗兩粒（瓜煲半小時後搯起瓜內魚翅，皮不要，煲兩個半小時）
清補凉湯
材料：節瓜、果皮一片、無核紅棗八粒（煲兩小時）
栗子粟米湯
材料：栗子、粟米、蜜棗兩粒、淮山、蓮子（煲兩小時）
娛樂資料庫：殭屍約會譜戀曲
現年37歲的萬綺雯，89年參加亞洲電視舉辦的亞洲小姐競選奪得亞軍，晉身娛樂圈。愛情方面，她曾先後與呂頌賢和甄子丹拍拖，但最終都分手收場。萬綺雯2000年8月與劇集《我和殭屍有個約會》的編劇陳十三，在美國閃電結婚，兩夫妻十分恩愛。
