動漫節十周年啦！雖然下周五先開波，但人潮洶湧之情況已可想而知。十周年誌慶，主辦單位準備大量活動，不過Fans最期待的還是動漫精品，尤其炒價最強的首辦Figure，個個金睛火眼集中火力要搶到手！家陣就率先為你準備動漫節搶購攻略，好讓DieHardFans們開閘即直達目標，搶得心頭好！
記者：劉明慧
攝影：楊錦文
貴！天下聶風$2,600
攤位：D64
還記得當年排幾晚通宵，只為第一時間到天下的攤位搶刀嗎？不過天下近幾年沒有再出大刀，但風雲首辦仍然是每年重頭作，上年會場限定版步驚雲，半小時即搶購一空。今年重點搞作落在聶風身上，以16吋巨型Size，加上木台，再配合摩訶無量的劍招，勁有氣勢，而且顏色面相夠晒精緻，分別有特別版同普通版合共100個，還可以同去年出的步驚雲合體，完全捉住Fans要儲齊一套的心理。
至於漫畫方面，本土薄裝只出了四年一度的紀念畫集，輯錄401-500彩色封面，反而授權漫畫才是重頭戲！日本授權中文漫畫就強推《魔王》，是由日本著名作家伊幸太郎同名小說改編，動漫節優先推出首兩期。而一直暢銷的《Onepiece》，更推出閃銀色封面特別版，以賀連載第50期，還要香港獨家發售，連日本都無，絕對值得收藏。
摩訶無量之聶風特別版$2,600
會場特別版，特別在上身衫由黃轉成珍珠白，與普通版合共生產100個，價錢二千六，唔知網上炒價又會幾錢呢？
摩訶無量之風雲6吋版$250/套
搶不到16吋版，可以揀6吋版，而且一套買，都只係二百幾，又有特別版同普通版兩款顏色。
摩訶無量之新版步驚雲$1,288
上年反應好，今年再推50個，顏色、手部動作都有改動。
玉皇朝經典《龍虎門》首辦
攤位：C11
提起玉皇朝，就想起《龍虎門》，上年出了火雲邪神，今年主角落在王小虎、王小龍同玉兒身上，單是王小虎的電光毒龍鑽造型首辦就有三款，而王小龍就同玉兒齊齊拍住上，推出首辦套裝，而其他角色火雲邪神就成了電話繩，另外還有一大堆精品如郵票、扭計骰同T恤等等。
漫畫方面，有於動漫節首次發售之《神掌龍劍飛》，由黃玉郎同牛佬合力創作故事，屬各擁躉期待之作。日本漫畫方面，力推《花樣男子》第37期，內有作者訪問、未發表的隨筆漫畫初次曝光、花澤類當主角的番外篇「談談我的事情吧」及花樣男子TreasureBox，對花樣Fans絕對吸引。食住電影版上畫強勢，再推完全版，加埋作者神尾葉子會在8月2日（星期六）現身簽名會，玉皇朝攤位將會有幾逼人，唔使多講啦！
特別版王小虎電光毒龍鑽首辦$1,180
特別版同限定版分別只有20個，數量極少，但限定版是透明的，所以價錢貴$200，但個人覺得上色的靚仔啲。
王小龍+玉兒首辦套裝（金童玉女首辦套裝）$1,700
小龍出易經降龍、玉兒出鳳舞九天，數量只得20個。個人認為玉兒動感較弱，小龍生動得多。
Lego50周年Show罕物
攤位：C02
Lego50周年，當然大搞，有罕有19吋LegoFigure、過千LegoMinifigure同星戰場景等等展覽，仲有拼砌大賽，單單攤位面積就有共20個Booths，認真落本。
搶金紅色三一萬能俠
攤位：B03
Bandai今年除了搞高達模型大賽之外，仲有「動漫歌唱大賽」和「超級粉絲問答大賽」，不過最吸引都係會場限定的電鍍色三一萬能俠超合金，暫時只限美國SanDiego漫畫節同今次動漫節有得賣，而且香港仲快過美國幾日推出，仲唔係必炒貨？
孩之寶送限量柯柏文
攤位：C12
首次參加動漫節，當然要食住《變形金剛》柯柏文電影個勢。變形金剛卡通版玩具據講隻隻炒價，場內還有大量精品出售。購物滿$300仲會送全球限量88隻金裝柯柏文Figure，香港就只得十個！罕！
HotToys黑兵
攤位：C06&C07
本地土炮玩具HotToys，今年就玩星戰卡通版，順勢在動漫展推出Q版StarWarChubby，黑兵可層層打開，有3個Size，可愛又有型。
台灣寶HuskyX3
攤位：C19
在台灣極受歡迎、又開cafe又出精品的Husky狗仔，早前的銀色HuskyX3連續打破台灣玩具展拍賣紀錄，今年動漫節就出HuskyX3Bible、7吋搪膠公仔，另外仲有Huskymini版本、T恤、袋等精品，同場仲有白色可愛IcyBunny展覽，到時你可能會聽到不少講國語的Fans於攤位打轉。
2008香港動漫電玩節
日期：8月1日至8月5日
地點：香港會議展覽中心一號展覽廳
開放時間：8月1至4日11:00am-10:00pm、8月5日11:00am-8:00pm
門票：$25（於7-11、OK便利店及會場發售）
網址： http://www.ani-com.hk/
