油價高企，一眾「油王」成為球壇新勢力！去年11月，巴西前鋒麥諾艾維斯加盟沙地阿拉伯球會伊蒂哈德，當時佢並冇向大阪飛腳提出離隊，只係無故失縱；缺席數課操練後，便赫見麥諾艾維斯出現於伊蒂哈德官網上，同該隊高層握手影相。
麥諾艾維斯係06年日聯神射手，突然離隊令教練西野朗失晒預算，飛腳成績亦大受影響，最終僅以第3完成球季，幸好球隊亦執番400萬美元（約3,120萬港元）轉會費。
巴爾900萬美元投阿聯酋
今周，飛腳前鋒巴爾轉投阿聯酋球會阿爾艾利亦接近落實，轉會費900萬美元，年薪高達450萬美元；呢個天價令巴爾無法拒絕，惟有向飛腳表達離隊意願，更透過日本傳媒向球迷表示遺憾。
巴爾上季射入20球，今季則入10球，排射手榜第2，飛腳上季失去麥諾艾維斯，𠵱家又失去巴爾；由於國腳前鋒播戶龍二病癒不久，巴爾角色非常重要，飛腳必須喺9月亞冠盃8強開戰前，盡快搵新前鋒。
巴爾離隊，唯一好處係飛腳賺到唔少轉會費。高原直泰由法蘭克福加盟浦和紅鑽，轉會費都係200萬美元，300萬美元轉會費喺日本球壇已算係極限；雖然飛腳失去一位好球員，但卻換來900萬美元天價轉會費。
阿拉伯球會非常有錢，大部份球會由皇室擁有，佢哋相信金錢萬能，球會預算並無上限；佢哋已放棄購買過氣球星政策，改為向知名度唔高、但有實力嘅外援埋手。飛腳陣中嘅巴西外援，成為阿拉伯球會至愛。
日聯93年成立以來，球會不斷向海外收購球星，但時移勢易，𠵱家係時候喺海外球會身上賺番一筆！
森本高史