金句多多嘅講波佬黃興桂認真巴閉，事關喺06年嘅世界盃，同埋之前舉行嘅歐洲國家盃，無綫都曾經力邀佢做嘉賓評述，但礙於佢係ESPN衛視體育台嘅評述員而告吹。不過，喺無綫三顧草廬嘅誠意打動下，ESPN終於答應放人，下個月北京奧運期間，黃興桂將會為無綫擔任足球同籃球賽事嘅專業評述。
「最勁嘅體壇盛會」
前晚馮仁昭同黃興桂傾電話，佢好興奮咁話：「可以參與北京奧運嘅主持工作，真係有今生冇來世，公司破天荒第一次肯放我幫第二間電視台，可能係因為我夠忠心，喺公司做咗13年，而且又同佢哋續咗約。呢次我希望佢哋可以將就一次，因為我真係好想能夠用我嘅假期嚟做自己畢生最勁嘅體壇盛會，高層終於答應咗，但就講明要用番我嘅ESPN評述員身份，今次好多謝公司，好多謝TVB畀面。」
「惜伍晃榮唔喺度」
雖然黃興桂做無綫奧運期間，答應要飛返新加坡幫ESPN講幾場棒球，飛嚟飛去好鬼頻撲，但黃興桂話乜都冇計：「好開心終於可以同Keyman（馬啓仁）一齊講波，最可惜係伍晃榮已經唔喺度，冇機會同佢做拍檔。」至於酬勞方面，黃興桂話無綫鍾意畀幾多就幾多，就算來回新加坡同香港嘅機票佢都冇同無綫計，因為做奧運真係有今生冇來世呀！
