政務司司長唐英年早前喺立法會出言不雅，講出「嗰班友」、「條條fing」呢啲市井用語，雖然獲基層市民認同，但堂堂高官談吐粗鄙始終有失身份；佢競爭對手財政司司長曾俊華噚日出席書展座談會時，都俾「潮」語考起，唔知道時下最潮用語之一「hea」點解，令人O嘴，高官可能要惡補俗語、潮語，免得再次出醜。
聽到「hea」字𢱑晒頭
鬍鬚曾噚日喺座談會上大講如何培育創意，佢話細個時成日發白日夢，所以建議家長，唔好太約束子女，迫仔女上興趣班，應該放心俾細路仔發多啲白日夢，曉得發夢、有夢想自然就會培養出創意，敢想先敢做，想都唔想，或者想唔出，都唔使講做出有創意嘅事啦。鬍鬚曾又叫家長，應該俾細路見識多啲唔同事物，唔好大個咗，淨係可以做時事評論員喎！
俾細路發夢，講就容易，有幾多父母聽得入耳做得出，八方感到好懷疑，座談會主持人蔡子強聽完，都不禁反問鬍鬚曾，鼓勵細路仔花多啲時間發白日夢，咪即係叫佢哋「hea」多啲？蔡子強咁講都唔係冇道理，但發白日夢又唔一定浪費時間，鬍鬚曾聽到蔡子強咁講，顯得十分𢱑頭，原來佢唔知「hea」點解。
八方相信在場人士，惟獨係佢對何謂「hea」𢱑頭，事關香港人日常做得最多嘅事就係「hea」，高官日理萬機，唔識都唔出奇。根據次文化堂社長彭志銘考據，「hea」有懶散、無聊、無所事事、懶懶閒嘅意思；書展熱賣書《潮語大教訓》例句解釋：放學後仲有好多時間先開始補習，去邊度hea好呢？
上述解釋唔知鬍鬚曾睇完明唔明，佢係番書仔，八方請教專家，提供埋英文解釋，「hea」有relax嘅意思，亦可解作消磨時間。高官唔識「潮」語無罪，卻令人擔心佢同市民脫節啫，希望高官畀啲心機理解一般小市民說話，唔好閉門造車就得嘞。
會計界候選人龔耀輝（即係方卓如）前晚事先張揚噚日會去踩場，「請教」鬍鬚曾創意問題博曝光，佢參選經驗少，唔知咁樣拉票好踩界，好彩有人指點，佢噚日冇按計劃行事，只在場內遊走，避過一劫。
mailto:[email protected]