藝術B幾年前在火炭工廠區租咗一個千一呎廠房，改裝為畫室，逢星期六日就在畫室教中小學生及家庭主婦、白領文員畫畫，冇學生上課之時就自己搞設計，呢份工唔算得上可以養妻活兒，但幫補吓家用，維持番自己嘅創作意念，就派上用場。香港地，藝術家好難豐衣足食，你估個個係楊善深乎，當今世界藝壇全部望住中國，姓Hui嘅唔會掂，改姓Xu，就會有人望吓，大陸藝術家大紅大紫，世人跟紅頂白，唔會多望香港一眼。
藝術B話佢哋行家有三大據點，就係柴灣、火炭與石硤尾。政府推出「石硤尾計劃」，因有政府支持，唔怕大幅度加租，兼且位於市區，最受藝術界歡迎。藝術B話火炭都有三幾十人租用廠房，搞過火炭藝術節，有市民注意到。不過咁，經濟復甦之後，業主加租，藝術B嘅業主今年加租兩成，十分難頂，佢唯有將畫室建築面積削減兩成，改租另外一個九百呎單位！租金上升，香港啲畫家左躲右避，遲啲再加租嘅話，可能又要祈望政府推出另一個「石硤尾計劃」打救佢哋。
最近睇報紙訪問財爺曾講創意城市，藝術B話好想問吓財政司司長，租金與創意是否可以共存？得吖，鄭大班剛好來電話今天七月二十六日下午二時起至四時，佢會與曾司長在會展舌戰，佢兩個一同出席一個「知識與創意經濟」講座──創新經濟（會展會議室四○一），一對一，可能擦出火花喎。左丁山立即通知藝術B，叫佢如果不怕排隊入場，大可參加呢個講座，向曾司長陳述在香港搞藝術之難，如果鄭大班故意畀面曾先生，唔敢提出刁難問題嘅話，在場人士大可以舉手發問喎。
今年書展嘅講座特別多，簽名會又多，馬主N話出版新書講馬術，作者係一位Dr.EdwardHermeus（荷蘭著名獸醫），此書教導讀者了解馬術體育，比賽規則及如何欣賞馬術賽，最為應景，已買飛睇奧運馬術嘅朋友，可以買番本讀吓先。另外作死靚女魏綺珊亦出版一本《靚太作死》，明日星期日下午六點舉辦簽名會，魏綺珊話四十歲嘅靚太知道老公滾紅滾綠之時，遇上俊朗教授，搞到靚太要生要死喎。