你有冇半夜起身搵嘢食嘅習慣？都市人工作壓力大，好多時因為做嘢搞到冇晒胃口，到咗夜晚失眠就起身狂食，原來呢個係一個進食失調嘅問題，叫做「夜食症」。患者仲越嚟越多，精神科醫生同心理專家近年開始關注，如果唔早啲醫，好可能會變成真正進食失調症患者。
受壓力並患抑鬱
厭食症同暴食症大家就聽得多，原來進食失調仲有好多類別，其中一類就係夜食症。香港進食失調康復會嘅介紹，夜食症係一項比較新嘅進食失調類別，暫時未俾美國精神醫學會列入《精神疾病診斷與統計手冊》，但患者人數有上升嘅趨勢，相信好快會列為其中一種進食失調疾病。
雖然有關夜食症嘅臨床研究唔多，但患者共同嘅病徵包括朝早或者晏晝無胃口，但到咗黃昏或者上床之後先開始想食嘢，喺夜晚呢段時期至狂食，吸收嘅熱量可以佔全日嘅一半，甚至更多，由於食飽就瞓，熱量儲存喺身體，所以有夜食症嘅人特別容易肥，好多人係出現症狀之前都係正常體重，但係短短一年半載就變成癡肥。
有夜食症嘅人通常都意識到自己問題，但係就改唔到，有啲人甚至會一晚起身食幾次零食先瞓得着，暫時唔知道夜食症嘅成因，但患者嘅共通點係壓力好大，同時又係抑鬱症患者，聽聞香港近年都發現零星個案，醫學界開始關注呢個問題，患者應該盡快接受治療，如果唔係隨時有機會惡化到暴食或者厭食症。
blog主：醫神