芒果入饌係好味，但呢個世界唔止芒果一種生果，仲有大把生果甜品有排歎。人貪新鮮，知你為食，今日搵為食少女六人組試味兼評分，眾人異口同聲話：「花心湯圓最得意，賣相好靚呀。」有幾花心，試過咪知囉。
記者：洪偉順
攝影：梁細權、譚盈傑
兩公婆諗創意甜品
「等我話你知，乜嘢叫真正生果甜品，」有幾分似吳彥祖的「溏苑」負責人Jackie用略帶囂張口吻話：「甜品，最緊要有創意，我唔會再諗點樣煮好一碗西瓜西米露，我要諗新嘢。」創意，唔係得個噏字，佢最大嗜好係屈廚師加班，夾埋老婆坐定定，齊齊諗計研究新式水果甜品。望餐牌，甚麼芒果腸粉，概念擺明抄自中式點心，仲有鮮果真假拼，真係估佢唔到邊瓣堅邊瓣流，花心湯圓仲反傳統，透明望得穿，晶瑩通透靚到唔捨得擺入口，齋睇甜品名已經好有噱頭。為食少女組試味，大讚無話甜到漏，款式少見有驚喜，結果5分鐘掃晒，仲要碗碗照鏡，有幾好味，有眼睇啦。
（旺角廣華街3號百利達廣場地下1號舖/21714913）
芒果腸粉$29
賣相唔靚仔，勝在創意搭夠，唔用米漿改用椰汁做腸粉皮，包芒果肉淋杰撻撻鮮芒果汁，撈勻食，滑到跣入喉嚨，一口椰香好正。
Jean評：「9分，腸粉好滑，唔淋豉油淋芒果汁，好得意。」
花心湯圓$30
用蒟蒻做湯圓皮，人手逐粒包，釀鮮菠蘿肉同紅豆茸，似個裝住水果嘅透明盒，建議咪扮斯文，一嘢啪入口啦。
Mary評：「9分，第一次見透明湯圓，有創意。」
鮮果真假拼$38
邊兩款生果係假嘅呢？答案係疑似橙肉同提子，前者用鮮橙汁加蒟蒻製成，再切到啱啱好嵌番入橙皮，呃晒！後者用黑加侖子汁加蒟蒻製成，色澤同味道都似到十足十。
Poon評：「10分，驟眼睇幾難分真假，好得意呀。」
木星$40
造型似木星，哈密瓜對半切開，挖走中間果核再放入呍喱拿雪糕、椰汁冰同兩支朱古力花生棒，果肉連雪糕等餡料一齊食，清凉到爆。須早一日預訂。
Gloria評：「7分，哈密瓜造型真係似木星。」
扮嘢壽司$25
果然夠扮嘢！用西米、碎珍珠同大菜糕取代壽司飯，用芒果肉、火龍果取代平時食開嘅三文魚、螺片，過癮！
Zuki評：「8分，水果做餡料，一啲都唔肥膩。」
香蕉透心凉$26
Jackie話呢碟係「鼻涕」，用筷子夾起透明軟身蒟蒻，又真係幾分似鼻涕，賣相係肉酸但好好味，香滑微酸有咬口。
Peggy評：「7分，啲鼻涕好抵死呀，哈哈哈。」
