三年前憑無綫劇集《阿旺新傳》中李笑好一角成為傳媒追訪對象後，湯盈盈近日再度備受關注，不過這次焦點是她跟錢嘉樂的緋聞。盈盈台前風情萬種，現實中愛情生活並不如大眾所想般多釆多姿，據她說到目前為止，只拍過四次拖，皆因她在擇偶方面堅持七項原則，錢嘉樂能否達標就要看他努力了。 撰文：何永寧
湯盈盈於96年挾華裔小姐名銜成為無綫藝人，不過其後她所演的角色不外乎是情婦，或是風塵女子，令她與「風騷」、「狐狸精」這等包含貶意的名詞掛鈎，直至05年她才憑扮演《阿旺新傳》中滿面雀斑及哨牙的李笑好翻身，她不但獲得無綫的最佳女配角獎項，更令她備受觀眾愛戴，成為她的演藝事業上轉捩點。
湯盈盈毫不在乎的說：「可能我係喺外國長大，性格比較男仔頭，好容易同人熟絡，啲人咪覺得你風騷囉，其實要我演呢啲角色冇問題，只要阿Q啲諗，你做得好、人哋至會搵你啫！不過諗諗吓俾人講得多都有啲驚，最驚人哋以為現實之中嘅湯盈盈都係咁，講明呀做戲咋。」
俗語有話，不可以貌取人。外表男仔頭的湯盈盈不但有一顆溫柔的心，原來她煮菜亦有一手，四餸一湯絕對難不倒她，她說：「唔好以為我個款男仔頭，就唔識做屋企嘢，只要做咗我嘅男朋友就會知道我有幾溫柔，我煮飯煲湯都好叻㗎！好多朋友都好surprise（驚奇）我識得咁多嘢。」
須孝順懂浪漫
可惜要品嚐湯家小廚，首要條件必須成為她的男朋友，但說難不難，說易又彷彿不太易，她笑說：「揀男朋友我有七項條件，當然最緊要係有feeling（感覺）同安全感，呢樣真係幾抽象㗎，其次係孝順同識得照顧我，係女仔都鍾意俾人錫㗎啦！跟住當然要有事業基礎。」
至於其餘兩項，湯盈盈表示是男朋友除了要給她適當的自由度，還要懂得製造浪漫逗她開心，她說：「試過喺加拿大收過擺滿一個車尾箱嘅花，當時感覺真係好甜好浪漫。」不知盈盈開出的擇偶七大條件，其緋聞男朋友錢嘉樂有多少項達標呢？不過提到嘉樂這名字，她的反應是異常抗拒，她說：「唉吔，唔好啦，唔想人哋以為我借緋聞搞宣傳呀！」
細數嘉樂優點
雖然盈盈口裏說不想評論嘉樂，但最後還是敵不過追問，她說：「安全感呢樣嘢，佢係龍虎武師出身應該都好打得嘅，至於感覺呢？就未有喎！講到孝順呢方面，佢好似都幾錫父母、佢嘅事業都唔錯，有戲拍又攞過獎，同埋又玩汽車特技，我諗佢都會有嘢教到我嘅，話晒佢喺個圈咁耐，其他就真係唔知啦！」
七項條件之中，嘉樂最少有四項令盈盈滿意，不過還有三項仍須努力，她說：「佢同祥仔（阮兆祥）、洪天明都係我嘅buddy（老友記），佢好鬼衰成日整蠱我，最近佢仲叫我唔好走咁埋呀，跟住去馬來西亞做『獎門人』都預咗俾人玩㗎啦！」
剖析四段情 異地戀難維繫
相信不少人都會有先入為主的印象，認定湯盈盈的感情生活應該如戲裏一樣的精采，身邊男伴不絕，但她卻透露到目前為止，真正談過戀愛的男友數目，竟然是一隻手可以算完，她說：「你問我拍過幾多次拖？咁你一定好失望嘞……只係得四次咋！」相比起今時今日的學生哥們，讀書時期的男、女朋友也不止此數呢！
思想有分歧
與湯盈盈談到她的四段情，她表示最長的一次戀愛足足談了五年，而最短的也有兩年時間，她自豪的說：「我唔似你哋諗嘅嗰個種女仔，我唔鍾意拍散拖，對感情我係好專一同認真㗎！頭兩次拍拖係喺加拿大，發生喺讀書時期，後來我要返香港發展，同男朋友少見咗，所以感情維繫唔到，之後兩個係喺香港識嘅CBC（CanadianBornChinese），即係加拿大籍華人，我哋有共同嘅話題同生活圈子。對上一次拍拖嘅男朋友咪係成日俾人影到相嗰個『肥仔』囉，佢同我一齊最耐，有五年咁耐，我哋分手到𠵱家都有兩年幾，之後我再冇拍拖。」問他們分手的原因？她說：「主要係因為我哋思想有分歧，發覺大家想行嘅路好唔同，所以協議和平分手。」
喺屋企發霉
雖然盈盈在此事上不願多談，但她強調一定與第三者無關，所以到現時她與這位前度男友仍然保持着好朋友關係，而且時有見面，她補充說：「我嘅感情生活冇大家諗得咁豐富，我啲朋友成日笑我鍾意留喺屋企發霉，總之大堆影碟加大堆零食，擺好個陣，啲嘢放得就手，就可以同男朋友喺屋企磨一日，好簡單。」
後記：憧憬浪漫婚禮
訪問期間風花雪月談到最近梁朝偉跟劉嘉玲的世紀婚禮，盈盈羨慕之情溢於言表。她說童話式的婚禮真的很浪漫，差不多是所有女孩子夢寐以求的，所以她坦言：「都想試吓㗎！」言下之意似乎有一試而後快之感，嘉樂仔收到未呀？
