今年初先接替洪丕正，掌管渣打香港個人銀行業務嘅包毅宏（Owen），噚日出席集團活動，用香港廸士尼做主題，搵嚟一班小朋友，着晒唔同民族服裝，大唱廸士尼樂園嘅「世界真細小」同跳舞。華華現場見佢好投入，拍晒手掌又歡呼打氣。
後嚟同佢傾偈，原來Owen有兩個仔，一個3歲一個5歲，都係勁鍾意廸士尼，所以上年被派嚟香港做嘢，一家人年尾先搬嚟香港，但短短半年多時間，佢話已經陪對囝囝去過好多次香港廸士尼。
佢仲話如果問兩個仔嘅夢想，一定係可以多啲去廸士尼玩，一啲都冇嫌香港廸士尼細咗啲。華華就諗，如果香港啲細路好似Owen嗰兩個仔咁鍾意廸士尼，咁廸士尼就唔使俾海洋公園襟住嚟打囉。