全世界唔少投資者都想向股神畢菲特請教投資之道，尤其喺呢個環球熊市陰影籠罩下，更加想得到股神指點迷津。但早排喺eBay網上，以高達211萬美金（1645.8萬港銀）投得跟股神共晉午餐嘅中國私募基金教父、赤子之心資產管理總經理趙丹陽啱啱回國，佢接受《北京商報》記者訪問時話：「那頓午餐明年才吃，所以相關的細節現在還無法預知。」讀者唔好誤會，以為趙丹陽事忙今年唔得閒，而係bid贏咗嘅人要到第二年先有機會同股神食飯，好似上年聯手勝出嘅Aquamarine資產管理兩個負責人，上個月先同到股神食晏。
呢個投資者夢寐以求嘅「與股神共晉午餐拍賣」由03年開始，當時投得拍賣價25萬美金（195萬港銀），06年中國「步步高」創辦人段永平以62萬美金（483.6萬港銀）投得，而今年則由趙丹陽破紀錄投得，當時連股神聽到211萬美金個價都嚇一跳。