港股昨日先升後跌，雖然微跌47點，但投資者依然擔心後市已缺乏上升動力，重現跌勢，但嘉賓認為不會缺乏上升動力，現市況只是恒指需要唞唞氣，8月份恒指更有機會上試24500點。
康：一中證券聯席董事 黃偉康
玲：主持 楊慧玲
玲：23000點好似有阻力，令人好擔心，究竟恒指係唔係已經升完？
康：如果大戶派貨一定唔會好似今日（周四）咁掟得咁急，大市其實都仲有一輪升勢，直至市場氣氛轉到極度樂觀嘅時候，恒指先會見頂，所以我相信喺𠵱家嘅氣氛之下，8月份應該仲會有一輪明顯嘅升勢。
玲：咁你之前27000點嘅恒指目標價會唔會有調整？
康：其實都有小小調整，由於24000點至24500點係一個好重嘅派貨區，所以我覺得嗰個位阻力應該會幾大，但係如果到時市場氣氛依然睇淡的話，恒指或者可以再上試26000點嘅水平，不過就算真係上到26000點嘅水位，大家都要小心啲，因為熊市反彈浪嘅轉勢可以好急好快，所以現時大家唔好追貨追得太緊同太瞓身喇。
玲：你有無邊個板塊可以推介畀讀者入貨㗎呢？
康：二三線藍籌股如果對指數影響唔係咁大嘅時候，反而未必可以跟到大市上升，如果現水位咁早追落後唔係唔可以，不過未必可以完全享受到大市上升嘅勢頭。另外，航運股前景都幾好，我相信佢會受惠於油價8月份跌落108蚊呢個水平，加上佢比航空股落後，因此有值博空間。
搶先貼股
南航等回吐吸納
九龍塘林先生：我2.9蚊入咗中國南方航空（1055），今日見佢大升，但係我又無走到，點好？
康：你要有心理準備短期個市一定有回吐，因為油價跌得急都會有個反彈出現，不過反彈唔會多，所以當航空股回吐嘅時候，可以借勢再吸納，南航喺3.5蚊嗰啲位會有支持，一升就會升到4蚊，所以你唔需要太擔心。
中石化受政策影響
大埔王小姐：我11.8蚊高位買入中石化（386），𠵱家點好呢？
康：刺激中石化最大因素，係內地推行成品油價格改革機制，追得上國際油價先可以令佢解困，不過我估計，呢一個行動最快都要下年先可以推出；所以中石化去到8.5蚊呢啲位壓力會幾重，不過7蚊就會有支持，要上返11.8蚊就有啲困難。
和黃跟油價上落
屯門黃小姐：想問吓和黃（013）點解插得咁緊要？
康：之前有炒作過憧憬佢出售赫斯基能源消息，但係油價回落憧憬減弱，令佢股價有啲跟咗油價行，現時佢股價未會有太大突破，可能要等恒指上返24500點水平，先會有較明顯升勢，不過到時嘅市況你就要加倍小心喇。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得mailto:[email protected]搶先貼股
